Nënkryetari i Grupit Parlamentar të grupimit politik CDU/CSU në Bundestagun Gjerman, Johann Wadephul ka deklaruar se nuk ka kompromis për kriteret e anëtarësimit të Shqipërisë në rrugën e integrimit evropian.
Wadephul thekson se qeveria Rama duhet të zbatojë me rigorozitet reformën për pavarësinë e gjyqësorit, luftën kundër korrupsionit dhe lirinë e shtypit. Në ditën kur Shqipëria do të mbajë Konferencën e Parë Ndërqeveritare me BE-në, Wadephul nënvizon se për Shqipërinë nuk do të bëhet asnjë tolerim.
Johann Wadephul: “Negociatat e anëtarësimit në BE me Maqedoninë e Veriut dhe Shqipërinë janë të afërta. Ky është një hap historik drejt integrimit të plotë të Ballkanit Perëndimor në BE. Negociatat duhet të fillojnë tani shpejt në mënyrë që më në fund të ndezin një dinamikë të re pozitive. Deputetët e parlamentit të Maqedonisë së Veriut kanë treguar largpamësi. Ata janë shprehur pro një propozimi kompromisi nga Franca që po kërkon shumë prej tyre. Por kjo hap derën për në BE. Mbetet për të shpresuar se ky hap është gjithashtu mënyra për të promovuar bashkëjetesën multietnike në të gjithë rajonin dhe për të ulur tensionet. Megjithatë, duhet të jetë po aq e qartë se ne nuk do të bëjmë asnjë lëshim ndaj kritereve të anëtarësimit. Për Shqipërinë në veçanti, Bundestagu ka formuluar kritere të qarta për pavarësinë e gjyqësorit, luftën kundër korrupsionit dhe lirinë e shtypit. Këto kritere ende nuk janë përmbushur. Pres që qeveria e Edi Ramës t’i zbatojë këto reforma me guxim dhe BE-ja do të kërkojë zbatimin e tyre gjatë bisedimeve”
Discussion about this post