Dy vajzat që gazetarja Klodiana Lala tha një ditë më parë se ndodheshin në makinë me Ervin Dalipajn dhe Juxhin Dautin, mesditën e së martës, janë identifikuar nga policia.
Dy vajsat janë nga Tirana, njëra 23 dhe tjetra 24-vjeç. Sipas gazetës “Panorama”, përpara grupit hetimor ato kanë rrëfyer se kishin shoqëri me dy të ndjerit.
Vajzat tregojnë se janë takuara me Dautajn dhe Dalipajn, në një kafe afër një pikë karburanti në autostradë, ku kanë qëndruar rreth 40 minuta. Megjithatë ato shprehen se më pas ato janë larguar me makinën e tyre, ndërsa djemtë sërish më vete dhe nuk kanë qenë fare në dijeni të atentatit.
Madje, lidhur me vrasjen ato deklarojnë se e kanë marrë vesh përmes rrjeteve sociale.
Rreth orës 13:55 të së martës, afër “Mbikalimit të Sukthit”, u vranë me breshëri plumbash ish-shef krimi ekonomik i Tiranës Ervin Dalipaj dhe miku i tij Juxhin Dautaj.
Mësohet se ish-shefi i krimit ekonomik në Tiranë, i akuzuar për rrëmbimin, torturimin dhe vrasjen e Gazmend Çollakut po lëvizte me një makinë “Audi” së bashku me mikun e tij Juxhin Dautaj në momentin që një makinë e zezë i ka ndjekur nga pas.
Pas atentatit në Sukth, Policia e Durrësit ka shoqëruar plot 12 persona në komisariat, për të hetuar mbi ngjarjen.
“Bëjmë me dije se grupi hetimor vijon hetimet intensivisht për identifikimin dhe kapjen e autorëve. Nga ana e uniformave blu janë shoqëruar 12 persona, me qëllim zbardhjen dhe zbulimin e plotë të ngjarjes”, thuhet në njoftimin e policisë. Pavarësisht se janë shoqëruar 12 persona, ende nuk ka asnjë të dyshuar. (D.D/Shuplaka)
