Protestës së opozitës në të ashtuquajturën “Çadrën e Lirisë” që po zhvillohet përballë selisë së Kryeministrisë, i është bashkuar edhe bashkëshortja e Lulzim Bashës, Aurela Basha.
Nga kjo tendë, bashkëshortja e kreut të PD-së kërkoi nga qeveria standarte europiane dhe u bëri thirrje qytetarëve që të mos pranojnë asgjë më pak.
“Unë doja të thoja që jam këtu si bashkëshorte por jam këtu edhe si nënë e dy fëmijëve të vegjël.
Jam këtu edhe si përfaqësuese e brezit të parë të të rinjve shqiptarë që në vitet 92-93 iu dha mundësia të ikin jashtë shtetit, të studiojnë e të kenë një mundësi për një jetë më të mirë. Jam këtu edhe si bija e atyre prindërve, nënave dhe baballarëve, që na rritën me aq sakrifica.
Sot, është detyra jonë që ta kthejmë këtë sakrificë mbrapsht. Është detyra jonë që sot të bëjmë ne sakrificën tonë.
Tani që ne dimë më mirë, kemi parë më shumë, është detyra jonë që të qëndrojmë këtu në këtë shesh e të mos pranojmë asgjë më pak se sa standardet europiane. Ne nuk jemi qytetarë të dorës së tretë, ne nuk duam standarde të tjera, ne duam standardet e vërteta.
Ne i kemi parë këto standarde, e dimë shumë mirë se çfarë janë ato. Ne duam për Shqipërinë atë që do çdo europian për vendin e vet”, u shpreh Znj. Basha.
(D.D/Shuplaka)
Discussion about this post