Ka nisur proçesi i votimit për zgjedhjet presidenciale në Austri, ku po përballen udhëheqësi i Partisë së Lirisë, Norbert Hofer i ekstremit të djathtë, me ish-kreun e Partisë së Gjelbër, Alexander van der Bellen. Vetëm pak muaj më parë, majin e shkuar, zgjedhjet u fituan nga Van der Bellen, por rezultati u rrëzua nga Gjykata e Lartë austriake për parregullsi në votim.
Norbert Hofer e mbështeti fushatën e tij mbi platformën antiemigracion, madje sugjeroi edhe mundësinë e një largimi të Austrisë nga BE-ja. Nëse Hofer fiton, ai do të bëhet kreu i parë i ekstremit të djathtë në një shtet të Bashkimit Europian. Sipas sondazheve kandidatët janë shumë pranë njëri-tjetrit dhe nuk mund të parashikohet rezultati.
Megjithëse posti i presidentit në Austri është kryesisht ceremonial, zgjedhjet po vëzhgohen si një barometër apo tregues, sesi do të shfaqen kandidatët populistë në sfidat elektorale pasuese në të gjithë kontinentin.
Vitin e ardhshëm, Franca, Gjermani dhe Holanda kanë zgjedhet dhe partitë antielitë dhe antiemigracion po fitojnë terren. Kjo është e dukshme edhe në politikat që po ndejkin edhe qeveritë aktuale për dëbimin e emigratëve nga vendet e tyre, të cilët kërkojnë azil ekonomik.
