Zyrtarët e zbatimit të ligjit në Teksas thanë të martën se personi i armatosur që vrau tetë persona në një qendër tregtare në zonën e Dallasit kishte “ide neo-naziste”, por dukej se i kishte veçuar viktimat e tij rastësisht dhe pa marrë parasysh racën, moshën apo gjininë.
Personi i armatosur, i identifikuar si Mauricio Garcia, 33 vjeç, hapi zjarr me një pushkë të stilit AR-15 të shtunën në qendrën e mbushur me njerëz Allen Premium Outlets në Allen, Teksas. Të shtënat masive përfunduan disa minuta më vonë kur policia qëlloi për vdekje të dyshuarin.
Tetë personat e vrarë në sulm përfshinin tre fëmijë – dy motra të vogla si dhe një djalë 3-vjeçar nga një familje tjetër, prindërit e të cilit ishin gjithashtu në mesin e të vrarëve. Përveç kësaj, 10 persona të tjerë, nga 5 deri në 61 vjeç, u plagosën.
Hetuesit gjetën tetë armë zjarri, përfshirë armën e vrasjes, nga posedimi i të armatosurit dhe automjeti i tij, dhe të gjitha armët ishin blerë ligjërisht, tha Hank Sibley, një drejtor rajonal i Departamentit të Sigurisë Publike të Teksasit.
“Pyetja e madhe me të cilën po merremi tani është: cili është motivi i tij? Pse e bëri këtë? Nuk e dimë”, tha Sibley në një konferencë shtypi pasdite.
Sibley tha se autoritetet kanë përcaktuar nga një rishikim i profilit të të armatosurit në mediat sociale, veshjeve dhe tatuazheve se Garcia “kishte ide neo-naziste”, por shtoi se ishte shumë herët në hetim për të thënë nëse të shtënat mund të konsideroheshin një akt i terrorizmit të brendshëm.
Discussion about this post