Qarkullimi në autostradat e Kosovës pritet të bëhet me pagesë, pasi të jetë vlerësuar efektshmëria e futjes së pagesës në “Rrugën e Kombit”, nga autoritetet e Shqipërisë.
Zyrtarë të Qeverisë së Kosovës kështu kanë deklaruar por ata tregojnë se ende nuk është marrë ndonjë vendim se kur do të fillojë kur lloj aplikimi.
Deri më tani Kosova, me buxhetin e saj ka përfunduar me investime në dy autostrada, njërën që e lidh me Shqipërinë, dhe në pritje të lidhjes me Serbinë nga ana tjetër e saj, dhe tjetra që ka nisur drejt Shkupit.
Ministri i Infrastrukturës, Lutfi Zharku për Radion Evropa e Lirë, thotë se procesi i vënies se taksës për shoferët në autostradë do të ndodhë, por janë duke pritur edhe përfundimin e autostradës Prishtinë- Shkup, në mënyrë që të ketë ofertë më të volitshme për ofertuesit potencialë.
“Ne po presim që të përfundojmë edhe autostradën ‘Arbën Xhaferi’ dhe kur të kemi një ofertë për cilëndo kompani, që ajo të ketë në disponim 140 kilometra mund të jetë një çmim shumë i volitshëm për pagesë për qytetarët tanë”, ka thënë Zharku.
Por, futja e taksave rrugore nuk është pritur mirë nga të gjithë qytetarët e Kosovës. Një pjesë e tyre e vlerësojnë si të panevojshme futjen e taksave për shfrytëzimin e autostradës, por ka edhe nga ata që e cilësojnë si një proces të domosdoshëm.
Dy autostradat e Kosovës të ndërtuara me buxhetin e vendit kapin një shifër prej mbi një miliard e gjysmë euro pa një ndihmë nga jashtë. (J.V/Shuplaka)
Discussion about this post