Kryeministri i ri i Qeverisë së Kosovës, Avdullah Hoti sot zyrtarisht mori detyrën e tij, i pritur nga sekretari Fitim Krasniqi.
Me një ceremoni shtetërore para ndërtesës së Qeverisë së Republikës së Kosovës, kryeministri Hoti, i vetëm parakaloi para Gardës së shtetit. Pak marrjes së detyrës Hoti shkurt tha se si kryeministër i vendit po ndihet shumë mirë. “Po ndihem mirë, një ditë e zakonshme pune. E kemi një program qeverisës dhe do të vazhdojmë me të”, tha Hoti kur u pyet për punën e parë që do ta bëjë si kryeministër.
Ndërkaq, ish-kryeministri Albin Kurti në një video mesazh, të mërkurën tha se nuk do të jetë prezent në dorëzimin e detyrës së tij, dhe iu premtoi qytetarëve se do të riktheheshin së shpejti.
Qeveria Hoti një ditë më parë u votua nga deputetët e Kuvendit të Kosovës me 61 vota pro, 24 kundër dhe 1 abstenim, ndërsa jashtë godinës ishte mbledhur dhjetra qytetarë që protestonin, duke kërkuar mbajtjen e zgjedhjeve të reja.
