Zyrtarë të Aleancës për Ardhmërinë e Kosovës bëjnë me dije se “përfaqësuesit ligjorë të Ramush Haradinaj kanë depozituar tek autoritetet franceze kërkesën për lirimin e tij me kusht”
Zëdhënësi i AAK-së, Muharrem Nitaj, deklaroi për Radio Evropa e Lirë se “kërkesa është depozituar dhe pritet lirimi me kusht i zotit Haradinaj”.
Dje gjykata franceze mori vendimin për ta mbajtur në paraburgim ish-kryeministrin e Kosovës, deri sa Serbia ta bëjë kërkesën zyrtare për ekstradimin e tij.
Vendimi i Gjykatës franceze për mbajtjen e zotit Haradinaj në paraburgim i jep një afat, siç thuhet në dokument, deri në “40 ditë autoriteteve të Serbisë për të kompletuar dokumentacionin me kërkesën për ekstradimin e tij”.
Zyrtarët e partisë së Haradinajt thanë se presin që brenda ditësh Gjykata të vendos për lirimin me kusht të tij, që do të nënkuptonte “qëndrimin brenda shtetit francez deri në zgjidhjen e rastit nga gjykata franceze”.
Ndërkohë ministrja e Drejtësisë, Dhurata Hoxha, tha se “i është drejtuar sërish ditën e sotme homologut të saj francez me kërkesën për lirimin e Haradinajt” dhe tha se “po përcillen të gjithë hapat ligjor që do të mundësojnë lirimin e tij”.
Ndërsa Ministria e Drejtësisë e Serbisë tha të premten se “në një afat sa më të shkurtër kohor” do të kërkojë nga Franca ekstradimin e Haradinajt.
Autoritetet franceze ndaluan dy ditë më parë në aeroportin e Bazelit Ramush Haradinajn, mbi bazën e një urdhërarresti ndërkombëtar të lëshuar nga autoritetet e Serbisë në vitin 2004.
Po për të njëjtin shkak Haradinaj u arrestua edhe në Slloveni në qershorin e vitit 2015, por u la i lirë pas disa orësh. (A.R/SHUPLAKA)
