Gjykata e Lartë ka shtyrë sërish seancën gjyqësore ndaj Tom Doshit, Mark Frrokut e Durim Bamit, të akuzuar për kallëzim të rremë, pasi avokatët e tyre kanë paraqitur kërkesa të reja. Po kështu asnjë prej të akuzuar nuk ishte i pranishëm në sallë.
Avokati i Tom Doshit kërkoi pushimin e çështjes, ndërsa avokatët e Mark Frrokut dhe Durim Bamit kërkuan veçim të dosjes dhe gjykim në Shkallën e Parë pasi Frroku nuk është më deputet.
Nga ana e saj, Prokuroria këmbëngul se çështja nuk mund të veçohet pasi ka prova të përbashkëta. Seanca e radhës u la për në datën 7 prill.
Prokuroria mban qëndrimin se vepra e “kallëzimit në bashkëpunim” qëndron në faktin se të tre të pandehurit kanë fabrikuar prova të rreme, sikurse është videoja Doshi-Bami, në të cilën flitej për një skenar ekzekutimi në dëm të deputetit Doshi me porosi të kreut të Kuvendit Ilir Meta.
(J.V/Shuplaka)
