Avokati Gylsen Zhllima ka komentuar në një intervistë për Fax News zhvillimet e fundit politike dhe juridike në vend, veçanërisht në lidhje me procesin zgjedhor të 11 majit dhe hetimet ndaj kryebashkiakut të Tiranës, Erion Veliaj.
Zhllima bëri me dije se KAS ka pranuar ankimimin e disa partive politike për verifikimin e procesit të votimit dhe theksoi rëndësinë që ka një rinumërim korrekt për të garantuar integritetin e zgjedhjeve.
“Nëse konstatojmë tjetërsim të votës, do të kemi hapa seriozë juridikë. Mund të çojë deri në vendime penale dhe hapjen e çështjeve që prekin direkt legjitimitetin e votimeve,” – u shpreh Zhllima.
Sipas tij, vendimmarrja që do të vijë nga KQZ është thelbësorë, ndërsa theksoi se anëtarët e KAS dhe Komisioneri vijnë nga Parlamenti dhe janë të detyruar të ruajnë balancën institucionale.
Gjithashtu Zhllima ka dhënë një analizë lidhur me arrestimin e kryebashkiakut të Tiranës, Erion Veliaj.
Ndërkaq, ai u shpreh se çdo masë sigurie duhet të mbështetet në fakte dhe elementë ligjorë të plotë.
“Arrestimi i Veliajt, nëse bëhet pa ekzistuar të gjitha kushtet ligjore, është një akt skandaloz. Nëse mungon një nga pikat ligjore, masa e arrestit duhet rrëzuar. Fillimisht duhet bërë llogaritja e pasurive të tij dhe sekuestrim i aseteve, jo burgosje politike,” – deklaroi avokati.
Ai nënvizoi se arrestimet për korrupsion dhe pastrim parash duhet të trajtohen me seriozitet të plotë, jo për qëllime politike.
Për Zhllimën, masat ndaj Veliajt mund t’i shërbejnë më shumë Partisë Socialiste dhe kryeministrit Rama sesa drejtësisë.
“Masa e sigurisë ndaj Veliajt ka hije të mëdha dyshimi. Kjo nuk i shërben drejtësisë, por është një manovër që i leverdis Ramës dhe Partisë Socialiste,” – theksoi ai.
