Avokati Theodhori Sallaku që përfaëson kryebashkiakun e Kavajës, Elvis Rroshi, u shpreh në mbledhjen e KQZ-së se nuk është bërë hetim i thelluar. Pavarësisht çfarë është folur për bashkëpunim edhe me autoritetet e huaja, ai shprehet se asgjë nuk është bërë.
“Nuk është bërë hetim i thelluar, nuk është bërë asgjë. Arrestimi i Rroshit u krye pa asnjë provë. Informacioni që ju dispononi nuk do të thotë gjë, ndaj e vetmja gjë që është e diskutueshme lidhur me mandatin është dënimi ndaj klientit tim kur ai ishte 16 vjeç.
Dënimi i Rroshit është dhënë 24 vite më parë. Ka rezultuar se autoritetet e huaja të përfshira në këtë hetim, nuk kanë dhënë asnjë prononcim përveç pretendimeve të tyre. Ndaj kërkoj të revokohet vendimi.”, u shpreh ndër të tjera avokati Sallaku.
Ai i kërkoi kryetarit të KQZ-së që të marrë në konsideratë kërkesën e tij, duke pasur parasysh se detyra e këtij komisioni është vetëm konstatimi. (XH.A/SHUPLAKA)
