Avokati i Klea Gjatës: Nuk ndodh që për 3 ditë të ketë verifikim dhe konfirmim thëniesh të një të penduari

Gjykata e Elbasanit vendosi masën e sigurisë arrest me burg për 10 prej të arrestuarve si pjesë e grupit të Laert Haxhiut.

Ndërsa për Fatjon Veliun u caktua masa e shtrimit të detyruar në spital, pasi thuhet se ai vuan nga probleme të shëndetit mendor.

Të arrestuarit akuzohen për disa ngjarje të rënda, mes tyre 6 vrasjeve. Zona e Gjykatës në Elbasan ishte “blinduar” nga policia këtë të diel, ndersa u krijua dhe një perimetër sigurie.

Prokuroria e Elbasanit kërkoi arrest me burg për 11 të arrestuarit, mes tyre edhe i penduari i drejtësisë, Artan Tafani. Kjo kërkesë u pranua nga gjykata.

Avokati i Klea Gjatës, vajzës së arrestuar e cila dyshohet se ka pasur lidhje dashurie me Haxhiun, është shprehur se prokuroria ka përdorur metoda ekstraligjore. Sipas tij nuk ka mundësi që për 3 ditë të ketë verifikim dhe konfirmim thëniesh të një të penduari.

“Ka një mungesë motivacioni të prokurorisë në veprimet hetimore të saj… Nuk ndodh që për 3 ditë të ketë verifikim dhe konfirmim thëniesh të një të penduari… Organi akuzës ka përdorur metoda ekstra ligjore për interesa të caktuara”, tha avokati i Klea Gjatës, Detar Hysi.

Sa i përket Laert Haxhiut, ai ndodhet i burgosur në Greqi. I konsideruar si person i shumëkërkuar nga policia shqiptare, ai u kap në Janinë në Maj të këtij viti.