Komisioni i Ligjeve vendosi së fundmi rihapjen e procesit të aplikimeve për Avokatin e Popullit për një periudhë 20-ditore për shkak të numrit të pakët të kandidaturave.
Vendimi u mor pas shqetësimit që ngritën anëtarët e Partisë Socialiste, të cilët u shprehën se shumë persona nuk i janë bashkuar këtij procesi për shkak se njoftimi i shërbimit të Kuvendit ka qenë i pamjaftueshëm.
“Mandati i Avokatit të Popullit ka përfunduar por ligji për këtë institucion nuk krijon vakum. Procesi i përzgjedhjes së Avokatit të Popullit kalon në disa faza. Shpallja publike e vendit vakant bëhet nga Kuvendi. Kjo faze është përmbushur. Në datën 22 shtator 2016 është bërë shpallja e vakancës. Afati i dorëzimit të dokumenteve ka qenë një muaj. Kanë shprehur dëshirë 6 kandidatura. Denar Veshaj dhe Jordan Daci janë skualifkuar pasi sollën dokumentet jashtë afatit. Një zonjë është tërhequr nga gara. Ardjan Licaj, Igli Totozani dhe Altin Goxhaj janë tre kandidaturat për Avokat Populli. Ka pasur shqetësime për njoftimin. Propozoj që Kuvendi të rihapë procesin e aplikimeve për një periudhë 20-ditore që të bëhen pjesë e këtij procesi edhe të tjerët. Nuk shtrohet problemi që deri tani ka pasur paligjshmëri. Unë shtrova faktin a konsiderohet njoftim publik vetëm njoftimi i grupeve parlamentare dhe njoftimi online në faqen e Kuvendit për të pasur një pjesëmarrje më të gjerë. 22 janari 2017 është afati kur mund të mbyllet procesi kështu që jemi brenda afatit”, është shprehur deputeti Manja.
Por sipas Petrit Vasilit të Lëvizjes Socialiste për Integrim, nuk ishte e nevojshme marrja në konsideratë e këtij propozimi pasi sipas tij nuk paraqitet nevoja e ndjekjes së procedurave ekstra ligjore. Me argumentin se askush nuk është ankuar për procesin e aplikimit, nuk është e nevojshme të shkohet në zgjedhje ekstra ligjore.
“Në ditën që mbaron afati dhe një grup tjetër interesi thotë se nuk ka pasur njoftim të plotë të procesit ne do rihapim sërish procesin? Duhet të jemi të kujdesshëm. Çfarë standardi ndjekim me ato persona që respektuan procedurën? Propozoj të mos marrim vendim sot. Të konsultohemi me shërbimet e Kuvendit dhe pastaj të marrim vendim”, ka argumentuar Vasili.
Nga ana tjetër, sipas deputetit Xhafaj, komisioni nuk ka bërë asnjë procedurë dhe vetëm shërbimi ka shpallur vakancën: “Komisioni është i vonuar e pranoj. Mendoj se në këtë rast nuk jemi para një diskriminimi negative”. (XH.A/SHUPLAKA)
