Avokati shqiptar sulmon zyrtarin e lartë amerikan: Një nga dështakët e politikës së jashtme të Obamës

Avokati Altin Goxhaj reagon pas intervistës që zëvendës sekretari amerikan i shtetit Hyot Yee, ka dhënë sot për Radio Televizionin e Kosovës, ku deklaroi se opozita duhet të hyjë në zgjedhjet e 18 qershorit.

Goxhaj shprehet shumë ashpër ndaj zyrtarit amerikan, duke e quajtur atë si një nga dështakët e politikës së jashtme amerikane të ish-presidentit Barack Obama.

“Zyrtari i Obames qe po pret ta zevendesoje Trump paska thone sot se Zgjedhjet duhet te behen ne 18 Qershor!!! Ky njihet si njeriu i Obames dhe eshte ne detyre derisa te zevendesohet dhe konsiderohet si nje nga deshtaket e politikes se jashtme amerikane te Obames!!!

Nese e kujtoni ishte ai tipi qe ne Korrik i doli per zot Donald LU-se per presionin qe i beri Opozites! Keta demokratet e Obames qe bene lemsh politiken e jashtme amerikane, duke shrftytezuar vakumin qe eshte krijuar ne Departamentin e Shtetit nga tranzicioni i zevenedesimeve te mbi 200 zyrtareve te larte qe kane dhene doreheqjen dhe po presin emerimet e reja republikane, para se te ikin dhe vete po mbushin valixhet duke perdor mungesen e vemendjes ndaj vendeve te vogla si Shqiperia…
E vetmja rruge e Opozites per tu mbrojtur nga ushtaret e vjeter te Obama-Soros eshte AntiSorosizmi!!!”, shkruan Goxhaj.

Pak orë më parë Hyot Yee u bëri thirrje politikanëve shqiptarë që të mos e mendonin zhvillimin e zgjedhjeve pa opozitën, dhe propozoi që opozita dhe qeveria të dialogojnë për problemet mes tyre.

“Shqipëria do të, do të duhej së paku, të mbajë zgjedhjet e saj me orar të rregullt në qershor, me 18 qershor besoj. Atje ne e nxisim opozitën dhe gjitha partitë që të marrin pjesë në zgjedhje në plotëni, jo që ti bllokojnë zgjedhjet. Dhe, nëse ka probleme ne besojmë se opozita dhe Qeveria duhet të kenë dialog që të zgjidhin problemet në mënyrë që zgjedhjet të jenë të lira të drejta.

Kur të vijë koha – dhe për këtë ka orar sipas ligjit se kur duhet të mbahen zgjedhjet – ne shpresojmë se edhe në Kosovë zgjedhjet do të mbahen në mënyrë të lirë dhe të drejtë. Jo si shteg i ikjes dhe jo si mënyrë për t’i ikur përgjegjësisë.”, ka thënë Yee për RTK. (D.D/Shuplaka)