Pak ditë pas publikimit të videos së babait të saj, i cili lëvdonte kryeministrin Edi Rama, kandidatja për deputete e PD-së Fatbardha Kadiu, flet më në fund mbi këtë ngjarje të komentuar mjaft nga mjedisi mediatik.
E përfolur shumë për shkak se flitej se rrjedh nga një familje e majtë, mbi të gjitha për shkak të videos së babit, Kadiu është e dyta në listën e Durrësit.
Në një intervistë për dritare.net, zbulon detajet e takimit të të atit me kryeministrin si edhe arsyet pse është bashkuar m PD-në.
INTERVISTA:
Zonja Kadiu ju jeni kandidate për deputete në listat e sigurta të PD, kur dhe pse jeni bërë anëtare aktive e kësaj partie?
Fatbardha Kadiu: Unë kam qenë pranë PD-së pranë ideve të saj. Por akoma më shumë, u afrova me PD-në në kauzën e saj për zgjedhje të lira e të ndershme. Aty si të thuash u takuam me PD-në. Jo rastësisht aspak, por na bëri bashkë kauza, që më dukej më e drejta e mbajtur ndonjëherë.
Po ashtu projekti i Lulzim Bashës për Republikën e Re, ku qytetari është në krye, dhe ai merr pushtetin, më është dukur gjëja më interesante në artikulimin politik të gjithë këtyre viteve. Pra jemi njohur dhe takuar me PD përmes ideve dhe vizioneve, në këtë rrugë u bëmë bashkë. Ndaj një vlerësim maksimal për programin ekonomik të zotit Basha, për uljen e taksave, për fokusimin tek zgjidhja, që është ekonomia, si motorri i vendit.
Figurat e reja të PD janë përfolur shumë, pse mendoni se ka pasur kaq reagim, qoftë negativ qoftë pozitiv?
Fatbardha Kadiu:Kandidimi i çdo figure të re është përfolur. Kjo është natyra njerëzore e cila e ka të vështirë të ambientohet me ndryshimin.
Jeni përfolur gjithashtu se jeni një familje e majtë, dhe këtë gjë e ka përforcuar më shumë takimi mjaft miqësor i babait tuaj me kryeministrin Edi Rama, vetëm pak ditë që ju të zyrtarizoheshit si kandidate për deputete në listat e PD.
Fatbardha Kadiu: Familja ime është e djathtë. Babai im është rekordmen dhe kampion noti. E gjithë jeta e tij është e lidhur me detin dhe notin. Babai im ka qenë prezent në çdo evenimet i cili lidhet me notin.
Listat e reja të Bashës, ju duken optimiste dhe lista që mund t’i sigurojnë partisë suaj një mandat qeverisës?
Fatbardha Kadiu: Kam një vlerësim personal për ekipin e zotit Basha, qoftë duke parë se kush bën pjesë e saj, qoftë duke pasur besim tek vendimi i tij. Lista është një vendim i kryetarit të PD-së, dhe jam e bindur se aty ka një kombimin dhe harmonizim të elementëve, për ta bërë atë sa më përfaqësuese e sa më të suksesshme.
Meqenëse jeni edhe pedagoge dhe jeni prekur drejtë për drejtë nga Reforma e Arsimit të Lartë. Basha ka deklaruar se një ndër vendimet e para të qeverisë së tij, do të jetë shfuqizimi i ligjit të arsimit të lartë, cili është qëndrimi juaj për atë ligj?
Fatbardha Kadiu:E mbështes absolutisht atë vendim, dhe gjithçka tjetër që parashikon projekti i tij për arsimin, si fuqizimi i universitetit publik, rritja e rolit vendimmarrës së studentëve, mundësimi i arsimimit për ata që nuk kanë mundësi ekonomike, si dhe hartimi i ligjit të ri, në konsulencë të plotë e të hapur me botën universitare dhe akademike.
Zonja Kadiu, si e vlerësoni punën e qeverisë Rama-Meta në 4 vitet e shkuara?
Fatbardha Kadiu:Një fakt domethënës për punën e tyre është se ata nuk po bëjnë një bilanc, i shmangen bilancit, i shmangen llogaridhënies se çfarë bënë në këto 4 vite. Me gjithë kërkesën e qytetarëve, të opozitës për të pasur një debat për bilancin, ju e shihni se ata i ikin, sikur të ishte një sëmundje. Premtimet e pambajtura që njihen nga të gjithë, janë 300 mijë vendet e punës, të pahapura sigurisht, shëndetësia e rrënuar, kur do të ishte falas, taksat e rritura, kur do të uleshin, çmimet e rritura, kur do të uleshin, çmimi i energjisë i rritur, kur do ulej. Pra, ata nuk kanë një bilanc, më saktë kanë një bilanc shumë negativ, dhe tani që erdhi dita për të dalë para gjykimit të popullit, ata fshihen, fabrikojnë teori nga më të ndryshmet për të shmangur pikërisht llogaridhënien.
A mendoni se Administrata publike në 4 vitet e shkuara ka qenë më shumë politike apo mertitokrate?
Fatbardha Kadiu:Administrata ka qenë reflektim i vizionit që kanë pasur Rama dhe Meta, për të pasur sa më shumë pushtet në duart e tyre, e për të ndarë përfitimet me miqtë dhe klientelën. (D.D/Shuplaka)
Discussion about this post