Familjarët e Elidon Mehmetit i cili u vra në një atentat në Vlorë më 9 prill, mohojnë që djali i tyre të ketë pasur precedentë të mëparshëm apo konflikte me persona të tjerë.
I ati i tij, Maliq Mehmeti, është shprehur se i biri nuk kishte asnjë konflikt dhe se nuk janë të vërteta aludimet e deritanishme se i biri ishte përfshirë në fushën e narkotikëve.
Ai tregon pasaportën e Elidonit, në të cilën ka vula të shumta hyrje-daljeje në pika të ndryshme kufitare të Europës, që nga Vjena, Bolonja, Ankona etj., madje edhe pak kohë para se ai të qëllohej për vdekje me armë zjarri.
“Nuk është e vërtetë që djali im ka qenë arrestuar apo dënuar jashtë vendit dhe që ka pasur precedentë. Im bir lëvizte lirshëm dhe nuk kishte asnjë problem me policinë as në Itali dhe as në ndonjë shtet tjetër”, tregon babai i Elidon Mehmetit.
Ai mohon çdo implikim të tij në vepra kriminale, duke përgënjeshtruar kështu të dhënat paraprake të policisë në lidhje me ngjarjen e ndodhur në zonën e Skelës.
Elidoni sipas të atit nuk kishte probleme, nuk ka pasur kërcënime dhe se ai punonte normalisht në qytetin e Vlorës.
Sipas të dhënave, ngjarja u ka kaluar në kompetencë hetimi Krimeve të Rënda, ndërsa janë duke u studiuar veç pamjeve të siguruara nga kamerat e sigurisë përreth vendit, edhe të dhëna që janë marrë nga persona që mund të kenë dijeni për ngjarjen. (M.D/Shuplaka)
Discussion about this post