Babai përdhunues kërkon të shkojë në varrimin e të birit që u mbyt dje: “Do djeg burgun nëse s’më lejojnë” Autoritetet e burgut: Kërkesa e vonuar

Një ditë pas vdekjes të të birit, i cili u mbyt teksa luante në Liqenin e ngrirë të Kasharit, Fatos Gurakuqi ka kërkuar që të jetë i pranishëm në varrimin e të birit. Mësohet se ai ka kërcënuar se nëse nuk lejohet të marrë pjesë në varrim do t’i vendosë zjarrin burgut.

“Dua të shkoj në varrimin e tim biri. Do e djeg burgun nëse nuk më lejojnë.”, është shprehur Fatos Gurakuqi.

Lidhur me kërkesën dhe kërcënimin e tij, kanë reaguar autoritetet e burgut. Në deklaratën e tyre, ata argumentojnë se kërkesa e bërë nga avokati i të dënuarit ishte me vonëse në raport me orarin e varrimit të të miturit.

“Fatos Gurakuqi ka kryer krim në familje. Varrimi i djalit ishte në orën 12:30, kërkesa e të dënuarit ishte e vonuar. Avokati e bëri kërkesën në orën 12:00. Nuk paraqitën as certifikatë familjare.”, mësohet të kenë thënë autoritetet e burgut.

Shtetasi Fatos Gurakuqi vuan dënimin në burg pas denoncimit të së bijës 15-vjeçares për abuzim seksual. (XH.A/SHUPLAKA)