Babait të gazetarit i vjedhin 3 kuti me libra, groteske ajo që i lënë “dhuratë”

Gazetari Erl Murati përmes një postimi në rrjetet sociale ka denoncuar faktin se babait të tij i kanë vjedhur tre kuti me libra, të cilat i ruante prej vitesh, në tre gjuhë të ndryshme, shqip, anglisht dhe rusisht.

Ajo që të bie në sy në foton e postuar nga ana e gazetarit, është një Kushtetutë e Shqipërisë, e cila duket se nuk iu është dashur fare grabitësve, të cilët e kanë lënë në fundin e një kutie kartoni.

“Babait tim i kanë vjedhur 3 kuti me libra. Duhet t’i kenë futur në thasë të mëdhenj për të mos rënë në sy gjatë ikjes, sepse kutitë bosh i kishin lënë aty. Me kot shënimi që kish lënë im atë: Lutemi mos prekni! Mërzitja e tij, më mërziti dhe mua.

Por, çdo “tragjedi” ka anën e vet groteske, e më bëri të vë buzën në gaz. Nga 80-100 libra në tri gjuhë, shqip, anglisht e rusisht, e vetmja vepër që hajdutët s’kishin begenisur ta vidhnin, por e kishin lënë aty sepse me siguri s’i duhej as dreqit, ishte Kushtetuta e Shqipërisë”, shkruan Murati.