“Babalja”/ Flet nga gjykata si i pandehur Salianji: Më akuzojnë për agjitacion në bashkëpunim

Ish-deputeti i Partisë Demokratike, Ervin Salianji është  thirrur nga prokuroria ku është njohur me akuzat që rëndojnë mbi të. Prokuroria e Tiranës  e ka shpallur si të pandehur për çështjen “Babale”

Pasi  është njohur me akuzat ,Salianji në një prononcim për mediat është shprehur se akuzohet se denoncoi trafikantët e drogës, gjithashtu u shpreh se akuzohet për agjitacion në bashkëpunim me gazitarin Jetmir Olldashi.

Salianji e ka quajtur të papranueshëm vënien nën akuzë të gazetarinJetmir Olldashi.

“Akuzohem se denoncova trafikantët e drogës. Unë akuzohem për agjitacion në bashkëpunim me gazetarin Jetmir Olldashi”-u shpreh Ervin Salianji.

Kujtojmë që çështja penale u çel pas akuzave të vlonjatit  Albert Veliu, i njohur me nofkën “Babale”. Dosja e famshme e cila po hetohej nga prokurori Përparim Kulluri, është kthyer pasi nga hetimet rezulton se audiopërgjimi është i rremë. Po ashtu dosja në fjalë është kthyer në polici, me qëllim kryerjen e veprimeve të tjera hetimore.

Skandali që po hetohet shpërtheu pas publikimit nga ana e Partisë Demokratike, të një materiali audio, ku një person i identifikuar si “bashkëpunëtori x”, fliste për një bashkëpunim të mundshëm me vellain e ministrit të brendshëm të kohës, për të trafikuar lëndë narkotike nga Shqipëria drejt Italisë. Më vonë, personi në fjalë, u zbulua se ishte Albert Veliu, i njohur edhe si Berti i Abesë, ish i dënuar për trafik droge. Të njëjtat akuza për Agron Xhafajn, Albert Veliu i bëri edhe përmes një interviste dhënë gazetarit Jetmir Olldashi, e cila gjithashtu u trasmetua nga selia e Partisë Demokratike.

Ndërkohë, më herët Krimet e Rënda zbuluan se audiopërgjimi ishte i rremë dhe se zërin e Agron Xhafajt e kishte realizuar Fredi Alizoti. Ky i fundit, së bashku me Babalen dhe gazetarin Jetmir Olldashi po hetohen për akuzën e kallëzimit të rremë. Alizoti ndodhet nën masën e arrestit me burg, ndërsa Albert Veliu, u arratis ne Kosovë dhe mundi t’iu shpëtonte prangave. Në fund të dhjetorit Babalja u arratis edhe nga Kosova përmes Hungarisë dhe sipas avokatit të tij mbërriti në Belgjikë, ku i është bashkuar pjesës tjetër të familjes dhe ka kërkuar azil politik. Në gjendje të lirë po hetohet gazetari Jetmir Olldashi.

(B.K/FAXWEB.AL)