Arta Marku e zgjedhur pak muaj më parë kryeprokurore e vendit ka dhënë dje intervistën e saj televizive përballë gazetarit Sokol Balla.
Pa presionin që kanë zakonisht studiot, Marku pati mundësinë që të shfaqej më së miri si një grua e përkushtuar ndaj punës por edhe familjes.
Gjithçka nisi me disa pyetje familjare të tipit: nga e ke orgjinën, apo sesa fëmijë keni?
Dhe kryeprokurorja na tregoi më së miri se vinte nga një familje ku nëna e saj kishte qenë e persekutuar, ndërsa familja e saj e ngushtë përbëhej nga katër anëtarë, ajo burri dhe dy vajzat. Madje njëra prej tyre në një moshë mjaft të vogël, 14-muajshe.
Marku tha se e kishte të vështirë largimin nga qyteti i Shkodrës ndërsa Tirana i dukej shumë e pistë.
Sokol Balla: Përveç interesit ka dhe kuriozitet të madh, pasi që në momentin e parë që emri juaj doli si një nga kandidaturat e mundshme dhe më pas si kandidatura më e mundshme për t’u zgjedhur, përveç interesit pati dhe kuriozitet njerëzor, se kush është Arta Marku?
Arta Marku: Vij nga një familje e thjeshtë si shumica e familjeve shqiptare me dy prindër të thjeshtë. Babai im ka qenë teknik i mesëm miniere. Ka mbaruar ndër të parët Politeknikumin “7 Nëntori” që është quajtur atëherë, ndërsa mamaja ime ka qenë e papunë për pjesën më të madhe të kohës deri pas viteve 1990, ku si shumica e shqiptarëve filloi me një tregti të vogël, ndihmuar dhe nga vëllai im.
Kjo është familja ime e origjinës. Kam dhe një vëlla dhe një motër, më të vegjël se vetja. Familja ime e re përbëhet nga unë, bashkëshorti dhe dy vajzat e mija, njëra është 8 vjeçe, në klasë të dytë dhe tjetra është 14 muajshe.
Sokol Balla: Sa e vështirë është për një nënë të re të shpërngulesh nga qyteti ku keni jetuar për shumë e shumë vite me radhë dhe të vini në mes të një rrëmuje të madhe siç është Tirana, ku nuk është vetëm një rrëmujë politike është dhe rrëmujë urbane. Sa të vështirë e keni pasur të ambientoheni me terrenin e ri?
Arta Marku: Në fakt, kjo ka qenë vështirësia më e madhe e momentit dhe unë kam vonuar shpërnguljen për 2 muaj, pasi e kisha shumë të vështirë. Tirana është një qytet i zhurmshëm dhe i papastër, krahasuar më Shkodrën. Mbase unë e kam dobësi Shkodrën, por e pata shumë të vështirë, jo vetëm unë por edhe familja ime. Tashmë kemi ardhur dhe shpresojmë që do përshtatemi për aq kohë sa do jemi.
(E.K/FAXWEB)
