Qyteti i Shkodrës do të ketë në hyrje dinjitoze. Kanë nisur punimet për zgjerimin e rrugës, Kthesa e Bërdicës-Ura e Bahçallëkut në të gjithë gjatësinë e saj prej afro 1.6 kilometrash.
Ndërtimi i urës së re të Bahçallëkut mbi lumin Drin është vepra më e rëndësishme e këtij projekti. Ura e re do të shërbejë për akomodimin e trafikut për mjetet që lëvizin në drejtim të Tiranës, ndërsa ura ekzistuese do të shërbejë për trafikun që lëviz në drejtim të Shkodrës.
Zëvendëskryeministrja, njëherësh Ministër i Infrastrukturës dhe Energjisë, Belinda Balluku inspektoi nisjen e punimeve në këtë kantier, ndër më të rëndësishmet sa i takon infrastrukturës në zonën e veriut të vendit.
Projekti parashikon edhe plotësimin e segmentit me elementët urbanë, si dhe hapësirat e nevojshme për lëvizjen e qytetarëve. Nga ana tjetër, kjo ndërhyrje do të rrisë vlerën e të gjithë zonës.
“Pavarësisht se janë infrastrukturë kombëtare rrugore futen në zona të banuara duke bërë kështu të nevojshëm që të jetë edhe pjesë të tjera që janë të ndërlidhura me pjesët e mobilimit urban, që ka të bëjë me trotuaret, ndriçimin dhe gjelbërimin”, tha Balluku.
Zëvendëskryeministrja tha se janë marrë parasysh dhe kërkesat e ardhura nga bashkia e Shkodrës për këtë projekt, i cili synohet të përfundojë plotësisht përpara afatit të parashikuar për të lehtësuar trafikun në hyrje-dalje të qytetit.
Drejtori i ARRSH, Gentian Gjyli sqaroi se rruga e ndërtuar do të jetë e kategorisë D, gjithashtu do të ketë edhe trotuare për secilin drejtim lëvizjeje.
