Zëvendëskryeministrja dhe njëherësh ministre e Infrastrukturës dhe Energjisë, Belinda Balluku ka zhvilluar dy takimeve bilaterale në Baku gjatë punimeve të COP29, ku është diskutuar një çështje madhore në interes të katër vendeve të Korridorit të 8. Balluku thotë se projektet e nisura duhet të përfundojnë sa më shpejt, për t’u përshtatur me nevojat që ka tregu.
“Takime bilaterale me dy kolegët Sanja Bozinovska dhe Vladimir Malinov shërbyen për të diskutuar një çështje madhore që është në interes të të katër vendeve të Korridorit të 8. Linjat e interkoneksionit që lidhin Shqipërinë me Maqedoninë e Veriut dhe Maqedoninë e Veriut me Bullgarinë. Në të dy takimet bilaterale ramë dakord se është momenti për të ecur sa më shpejt me këtë interkoneksion të rëndësishëm, i cili është pjesë e Korridorit të 8, ashtu siç janë hekurudhat dhe autostradat. Ndërkohë, projektet e nisura për ndërtimin e linjave të interkoneksionit duhet të përfundojnë sa më shpejt, duke pasur parasysh rritjen e vazhdueshme të kapaciteteve gjeneruese në të gjitha vendet e Korridorit të 8 dhe nevojat që ka tregu i këtyre vendeve për më shumë energji”, thotë Balluku në postimin në rrjetet sociale.
Dhjetëra liderë morën pjesë Konferencën e OKB-së për Ndryshimet Klimatike, e njohur si COP29, në kryeqytetin e Azerbajxhanit, Baku. Ata diskutuan se si të frenohet kriza klimatike dhe të zbuten pasojat e saj, të cilat përfshijnë përmbytjet më të shpeshta dhe të rënda, ciklonet, zjarret në pyje, valët e të nxehtit dhe thatësirat. Samiti synon gjithashtu të adresojë angazhimet e reja financiare për vendet e varfra që janë veçanërisht të prekura nga ndryshimet klimatike.
Discussion about this post