Një aplikacion që shërben për monitorimin online të rreziqeve operacionale, i cili nënkupton monitorimin e abuzimeve gjatë transportit dhe magazinimit të vlerave monetare, është blerë së fundmi nga Banka e Shqipërisë.
Ky forcim i masave nga ana e Bankës Qendrore nisi që pas vjedhjes prej 6 milionë eurosh në vitin 2014. Në një raportim të posaçëm dorëzuar në Kuvendin e Shqipërisë, Banka Qendrore njoftoi se në muajt nëntor-dhjetor, Departamenti i Kontrollit në bashkëpunim me Departamentin e Administrimit finalizuan procedurën e prokurimit të rinisur në prill 2016 për blerjen e një aplikacioni për menaxhimin e automatizuar të auditimeve dhe të procesit të menaxhimit të rrezikut operacional.
Pas disa vitesh inicimi dhe dështimi të procedurave për përftimin e një softëare të tillë, Banka e Shqipërisë njoftoi se ka finalizuar me sukses procesin e blerjes, duke përzgjedhur një nga ofruesit në fushën e auditimit të brendshëm dhe të përdorur nga shumë banka qendrore.
Banka e Shqipërisë, dy vitet e fundit ka hartuar rishtas shumicën e rregulloreve që rrisin kontrollet në të gjithë sistemin e lëvizjes së cash në rrjetin e saj. Në funksion të kësaj rritje, ajo njoftoi se funksionon tashmë Komiteti i Auditit.
(XH.A/SHUPLAKA)
Discussion about this post