Banorët e fshatit Gjocaj kanë protestuar ditën e sotme para Bashkisë së Burrelit, kundër ndërtimit të HEC-eve të planifikuar në këtë zonë. Qytetarët shprehen se do të përshkallëzojnë protestat deri në grevë urie.
Sipas raportimit të Fax news, banorët kanë thënë se në qoftë se HEC-et do të ndërtohen, ata do të detyrohen të largohen nga banesat e tyre sepse do të mungojë uji i pijshëm.
Ndërtimi i këtyre HEC-eve, sipas banorëve do të dëmtojë rëndë edhe bujqësinë, ku ata mbështeten për të siguruar jetesën.
Banorët kanë mbajtur në duar banderola të mëdha me shkrimet:
“Uji është jeta, të mbrojmë jetën!”
“Jetën e japim, ujin jo!”
“Ndal masakrës mjedisore!”
Ndërtimi i HEC-eve në zona të ndryshme të Shqipërisë ka nxitur protesta të shumta nga ana e qytetarëve. Një protestë e ngjashme u zhvillua dhe në zonën e Kaçinarit disa javë më parë.
(J.B/faxweb.al)
Discussion about this post