Banorët e Vërrisë dhe Kallmit në Fier janë ngritur përsëri në protestë ditën e sotme, ku kanë arritur të përzënë përfaqësuesit e firmës, që po kryen punimet për ndërtimin e impiantit të përpunimit të mbetjeve urbane.
Ky moment është kapur nga kamera e celularit të një banori, dhe është publikuar në faqen e “Nisma Thurje” në Facebook.
“Të vendosur! Banorët e Verrisë i kanë bërë tani barrikadë mjeteve të cilat duan të punojnë ilegalisht për ngritjen e impiantit të djegies së plehrave i cili rrezikon të helmojë tokat bujqësore dhe ajrin. Edhe pse firma nuk është pajisur me leje ndertimi, leje mjedisore etj, ajo kërkon të vazhdojë punimet.
Policia në vend që të ndalojë firmën në kushtet e flagrancës kërcënon banorët. Por ata nuk tremben. Sepse asgjë nuk është më e shtrenjtë se sa shëndeti i tyre.”, shkruan e “Nisma Thurje”.
Banorët janë në protestë dhe i bëjnë thirrje firmës të ndërpresë punimet e të largohet sepse nuk mbajnë përgjegjësi për çfarë mund t’i ndodhë makinerive. (D.D/Shuplaka)
