“Banorët po kërkojnë borxh, s’kanë marrë bonusin e qirasë”, Basha: 8.5 mln euro shkuan në xhepat e qeveritarëve

Kryetari i Partisë Demokratike, Lulzim Basha ka denoncuar faktin se banorët e prekur nga tërmeti në zonën e Durrësit nuk kanë marrë ende bonusin e qirasë.

Sipas tij, ata i kanë kryer të gjitha procedurat duke hapur edhe llogari bankare, por deri tani nuk ju ka kaluar asnjë lek. Basha tha në “Facebook” se ata janë të detyruar të marrin borxh për sa kohë që qeveria nuk po i ndihmon pas tragjedisë.

“Sot u takova me banorë të Durrësit të cilët kanë paguar para për dokumente e kanë hapur numra llogarie në banka, por nuk u ka kaluar asnjë lek për të paguar qeranë. Banorët janë detyruar të marrin borxh ndërsa edhe sot një muaj e gjysëm pas tërmetit, askush prej tyre nuk e ka të qartë sesi do të veprohet për riparimin e dëmeve, apo si do të zgjidhet problemi i strehimit për qytetarët e mbetur pa shtëpi. Në mes të dimrit, me qindra familje jetojnë ende në çadra apo makina”, tha Lulzim Basha.

Postimi i plotë i Lulzim Bashës:

Një muaj e gjysëm pas tërmetit, banorët e Durrësit nuk kanë marrë akoma bonusin e qerasë, ndërkohë që 8.5 milion euro kanë përfunduar në xhepat e qeveritarëve vetëm për afera e korrupsion, me zero shërbime të check up-it.

Sot u takova me banorë të Durrësit të cilët kanë paguar para për dokumente e kanë hapur numra llogarie në banka, por nuk u ka kaluar asnjë lek për të paguar qeranë. Banorët janë detyruar të marrin borxh ndërsa edhe sot një muaj e gjysëm pas tërmetit, askush prej tyre nuk e ka të qartë sesi do të veprohet për riparimin e dëmeve, apo si do të zgjidhet problemi i strehimit për qytetarët e mbetur pa shtëpi.

Në mes të dimrit, me qindra familje jetojnë ende në çadra apo makina. Dështimi dhe paaftësia e shtetit po iu kushton shtrenjtë qytetarëve që po përballen edhe me probleme shendetësore për shkak të kushteve ku po jetojnë.

Dhe e gjitha kjo, vetëm për të mos u prekur paratë që shkojnë në xhepat e dhjetë oligarkëve. Me 150 milion dollarë që shkojnë për ta, sot do ishin akorduar fondet për strehimin e banorëve dhe do kishte nisur puna për riparimin e banesave të dëmtuara.