Mbrëmjen e sotme, pas shoqërimit nga policia të 7 prej banorëve të Unazës gjatë protestës, banorët e tjerë janë mbledhur protestën e tyre përpara Drejtorisë së Policisë duke kërkuar lirimin e familjarëve të tyre.
Ata shprehën indinjatën e tyre për shoqërimet, duke thënë se policia nuk u kishte bërë me dije motivacionin mbi të cilin po kryheshin këto shoqërime. Sipas banorëve protestat e tyre kanë qenë paqësore, nuk ka pas degradime në dhunë prandaj këto shoqërime, sikurse ata shprehen janë politike.
Banorët i kanë kërkuar kryeministrit Rama të ndaloj arrestimet duke u shprehur “ t’i lërë të qeta këto familje, njerëzit janë lodhur tashmë, të anullojë projektin që këta njerëz te ikin në shtëpi’.
Sipas tyre shoqërime të tilla të një familje të tërë apo të një 17 vjeçari janë të pafalëshme.
Banorët duke u bërë thirrje gjithë personave që I mbështesin t’i bashkohen protestës pasditen e nesërme rreth orës 18:00, janë shprehur se nëse anullimi i projektit nuk ndodh ata do të marrin masa deri në përshkallëzimin e protestës.
Pas thirrjes për të protestuar një banor i Unazës është shprehur se: “Ne banorët e Unazës prisnim dekorime që zbuluam skandalin. Prisnim të na dekoronin, por jo. Ne na kanë trajtuar më keq sesa të burgosurit. Ata bënë krimin ne trajtohemi si të burgosur në të drejtën tonë.”
Për Fax News ka folur edhe babai i Altin Çekut. Sipas tij shoqërimi dhe më pas mbajtja e djalit të tij në Komisariat është e padrejt sepse ata po protestonin për të drejtat e tyre.
Ai shprehet: “Ne në protestë s’ kemi dalë për çështje politike, dolëm të protestojmë për të drejtën tone. Protestojmë kundër këtij shteti policor që ka krijuar Rama, dhe nesër do të protestojmë sërish. Mua s’më vjen keq për djalin tim që ka ngel aty brenda. Unë jam krenar për djalin tim që po reziston ndaj policisë së korrupuar. Ne nuk kemi gjë me policinë, ne mbrojmë të drejtat tona. Më vjen keq për policin që mbron një kriminel si Edi Rama. I bëjë thirrje Edi Ramës të heq dorë nga dhuna ndaj banorëve, përndryshe do të përshkallëzojmë protestat. Ju bëjë thirrje të gjithëve të mblidhen nesër në orën 18:00 të protestojmë.”
Protestës së banorëve të Unazës mbrëmjen e kësaj të marte i është bashkuar edhe ish deputeti i PD-së, Klevis Balliu. Sipas Balliut: “shoqërimet e sotme vetëm vërtetojnë që policia e shtetit është kthyer në një polici private të Edi Ramës, i cili vetëm e përdor për të ushtruar presion ndaj këtyre qytetarëve, për të ushtruar presion ndaj Unazës. Por të mendosh që do ta shembësh Unazën me këto presione idiote është njësojë si të mendosh që mund ta shembësh një mal me kaçavidë të vogël.”
Ai gjithashtu e ka cilësuar si të padrejtë mbajtjen në komisariat të Altin Çekut duke u shprehur se ai nuk kishte bërë “asgjë më pak e asgjë më shumë veçse kishte protestuar ndaj një vjedhje, projekti mafjoz prej 40 milion Euro”.
Discussion about this post