Skuadra e Barcelonës ka kthyer shumë shpejt në 2 pikë diferencën ndaj Realit kryesues në tabelën e klasifikimit duke treguar se mund t’ia dalë të fitojë edhe pa Mesin. Argjentinasi ishte i pezulluar për shkak kartonësh, por mungesa e tij nuk u ndie në fushë sot ndaj Granadas, ku rolin e liderit e mori Luis Suarez.
Uruguaiani shënoi golin e avantazhit në fundin e pjesës së parë, duke i dhënë qetësinë e duhur katalanasve, ndërsa më pas dha asistin për golin e dytë të shënuar nga Alkacer duke zgjidhur shpejt një situatë që mund të komplikohej pas barazimit të Boga.
Vetëm disa pritje të shkëlqyera të Oçoa bënë që Suarez të mos shtonte numrin e golave të shënuar në këtë ndeshje. Por në fund, Barcelona e mbylli gjithsesi me goleadë, pas gjuajtjes së Rakitiç të devijuar në portë nga Saunier dhe golit të Nejmar, që vulosi fitoren 4-1.
