Kampionati spanjoll është tejet i luftuar këtë vit. Barcelona ka mbajtur hapin e Real Madrid në luftën për titull të La Liga por duket qartësisht që katalanasit nuk po kalojnë një moment të mirë dhe janë të brishtë sidomos në mbrojtje. Skuadra e Luis Enrikes ka fituar 3-2 ndaj Real Sociedad, por në fund ka rrezikuar që të linte pikë në “Kamp Nou”.
Në fillim dukej se gjithçka ishte nën kontroll, pasi dy golat e Mesit në minutat 17 dhe 37 i dhanë një avantazh të ndjeshëm Barcelonës. Por në minuta e fundit të pjesës së parë ndodhi gjithçka. Filloi me autogolin e Umtiti, për të vazhduar me golin e Alkaser dhe përsëri shkurtimin e diferencës nga Prieto, gjithçka brenda harkut të katër minutave.
Barcelona nuk ishte në gjendje të mbyllte ndeshjen, përkundrazi, rrezikoi disa herë të pësonte golin e barazimit duke shfaqur probleme të mëdha në prapavijë. Gjithsesi, ekipi i Luis Enrikes arriti të mbyllte takimin me fitore, për të kthyer në tre pikë diferencën me madrilenët, të cilët do t’i ketë si kundërshtarë ne “El Clasico” të javës së ardhshme.
Ndërkaq, Atletiko Madrid ka fituar me rezultatin 3-0 ndaj Osasunës, në një takim ku në stolin e skuadrës së Simeones ishte i ulur edhe Keidi Bare. Ajo që ra më shumë në sy në këtë ndeshje ishin dy episode në fundin e saj, kur Atletiko fitoi penallti.
Por si gjuajtja e Karrasko, ashtu edhe ajo e Thomas, u pritën nga portieri Sirigu, duke vendosur një rekord të rrallë për kampionatin spanjoll pasi madrilenët çuan në 6 numrin e penalltive të humbur radhazi në La Liga. (E.K/SHUPLAKA)
Discussion about this post