Bardhi mblodhi opozitën, Mediu sugjeron takim të përjavshëm: Të jemi të bashkuar!

Në mbledhjen e opozitës të thirrur nga Gazment Bardhi kanë qenë në tryezë 43 deputetë.

Ndër ta, kreu i Partisë Republikane, Fatmir Mediu, i cili ka kërkuar që të ketë takime të përjavshme në mënyrë të tillë që të diskutohen çështje të rëndësishme për të ardhmen.

Një sugjerim për zgjedhjen e këtij ngërçi të politikës është vota e diasporës.

Fatmir Mediu: Na votuan për të përfaqësuar opozitën për të qenë bashkë përballë kësaj qeverie. Është një domosdoshmëri për interesin kombëtar. Kemi detyrë të pastrojmë realitetin politik që ka Shqipëria. Kemi nevojë për një reformë të plotë zgjedhore. Të jemi opozita e qytetarëve.

Të jemi të bashkuar jo vetëm në njohjen e manipulimit të zgjedhjeve por dhe në denoncimin e tyre.

Votimi i diasporës është e vetmja mënyrë për të bashkuar shqiptarët. Ky takim i sotëm duhet të marrë dhe disa vendime. Mendoj se duhet të jetë i përjavshëm, që të diskutojmë me njëri-tjetrin. Duhet të jemi deputetë për të kontaktuar me njerëzit.