Mbrojtësi i Borusia Dortmundit, Mark Bartra, që mbeti i plagosur mbrëmjen e djeshme pas shpërthimit pranë autobuzit të skuadrës gjermane i është nënshtruar një ndërhyrjeje kirurgjikale pas plagëve të marra.
Bartra u plagos në dorë dhe pas transportimit në spital u pa se kishte një thyerje të kyçit të dorës.
Copa nga xhami i thyer i autobuzit e kishin dëmtuar përgjatë gjithë krahut mbrojtësin spanjoll.
Portieri zviceran i skuadrës gjermane Roman Byrki, tregoi momentin e shpërthimit për mediat zvicerane.
Ai ishte ulur në autobuz ngjitur me Bartran dhe e pa nga afër momentin kur shoku i tij i skuadrës u plagos në krah.
“Autobuzi u fut në rrugën kryesore dhe në atë moment u dëgjua një zhurmë e madhe, një shpërthim. Pas shpërthimit, të gjithë si të mundeshim u shtrimë në dyshemenë e autobuzit. Nuk e dinim se çdo të ndodhte më pas. Bartra u godit nga copat e xhamit që u thyen nga shpërthimi”, tha Byrki për mediat zvicerane.
Ndeshja e planifikuar dje mes Borusias dhe Monakos do të luhet sot. (M.D/ Shuplaka)
