Kreu i Partisë Demokratike, Lulzim Basha ka folur ditën e sotme në emisionin “Fakt” ku ka treguar ndër të tjera se asnjë nga deputetët aktualë të PD-së nuk e ka të sigurt përfshirjen e emrit të tyre në listat e kandidatëve për zgjedhjet e 18 qershorit.
“Nuk ka asnjë deputet të garantuar. Forumet do vendosin për të gjithë. Unë kam shprehur mendimin tim personal për zotin Berisha si lider historik i Partisë Demokratike që, sa më takon mua, sa herë të deshirojë do ishte i mirëpritur por vendimi për çdo rast është i forumeve të Partisë Demokratike.
Risia këtu është që Partia Demokratike, besoj që në ditët në vazhdim do hapë një proces që nuk ka ndodhur më përpara, sa i përket konsultimit me anëtarësinë, me grupet e interesit, me qytetarët, jo vetëm me anëtarët e Partisë Demokratike, por me qytetarët, me komunitetin për deputetët e ardhshëm. Këtu përfshihet edhe shoqëria civile, edhe bota akademike, edhe sipërmarrja e ndershme, në mënyrë që të përfaqësohemi jo vetëm me ekipin më të mirë, me juristët, ekonomistët, shkenctarët, artistët, profesorët, sipërmarrësit, të rinjtë, të rejat më të mirë, ekipin më të mirë, më përfaqësues që ka Shqipëria, por që ky ekip të mos ketë lindur thjesht dhe vetëm në kokën e Kryetarit, por në dhomat dhe forumet e Partisë Demokratike. Të përfaqësojë sa më shumë vullnetin e qytetarëve shqiptarë”, tha Basha.
Sa i përket listave të hapura, Basha u shpreh se është pro kësaj teze, ndërsa e përforcoi qëndrimin e tij duke shtuar se “jam shprehur dhe po e përsëris prapë që jam edhe më shumë për listat e hapura, unë jam për një mazhoritar të pastër.Mos të ketë lista që ti bëjnë kryetarët e partive, po të jenë kandidatët nga partitë politike, por dhe kandidatë të tjerë të pavarur , të cilët konkurrojnë dhe marrin votat e qytetarëve”. (A.R/SHUPLAKA)
Discussion about this post