Sot pasdite nga çadra e protestës, kryeopozitari Basha komentoi shtyrjen e regjistrimit të koalicioneve.
“Zgjedhje e të lira e të ndershme do të ketë vetëm me një qeveri teknike. Sa për thëniën: Ti me bukë e ne me gurë, po të them që mjalti nuk lahet me shëllirë, ka vetëm një rrugë që mos ta hash të gjithën vet, t’i bashkohesh një pakti që i largohet Republikës së vjetër, i grushtit të kriminelëve dhe t’i pajtohesh axhendës së interesit qytetar. Republika e Re po vjen, është e ndershme. Republikë e Re do të thotë që në kushtet e zgjedhjeve të lira e të ndershme, vetëm përmes një qeverie teknike që i garanton ato, sovrani do të vendosë me votë të lirë,” -tha Basha.
“Ke qenë arkitekt i republikës së krimit dhe korrupsionit, harroje se do të ketë tërheqje nga ky projekt, republika e re po vjen dhe është e pashmangshme. Në kushtet e republikës së re, përmes ndryshimeve kushetuese do të jetë e pamundur të kemi një shtet arrogant me qytetarin”,-vijoi Basha.
Kryeministri i vendit Edi Rama reagoi në Twitter për kërkesën ndaj KQZ-së për shtyrjen e regjistrimit të koalicioneve për zgjedhjet e 18 qershorit.
“Kërkesa KQZ-së është e koalicionit PS-LSI&Etj si shprehje vullnetmirë ndaj PD&Etj. Po asnjë merak nëse ne me bukë e ata me gurë deri në fund”, -shkroi Edi Rama në Twitter.
Partia Socialiste dhe Lëvizja Socialiste për Integrim janë bërë bashkë, për t’i kërkuar përmes një letre Komisionit Qendror të Zgjedhjeve që të shtyjë afatin e regjistrimit të koalicioneve në zgjedhje.
Kërkesa mësohet se është bërë një ditë më parë dhe është firmosur nga krerët e dy grupeve parlamentare, respektivisht nga Gramoz Ruçi dhe Luan Rama.
Kjo shihet si një përpjekje për të negociuar me opozitën, në një kohë që PS dhe LSI nuk kanë marrë vendim zyrtar për fatin e koalicionit.
Kujtojmë se sot është dita e fundit e regjistrimit në zgjedhje. Konkretisht, në orën 00:00 skadon afati ligjor për regjistrimin e koalicioneve.
Në një kohë që Partitë Politike tashmë prej dy muajsh janë të ndarë në qëndrimet e tyre mbajtja e zgjedhjeve në afatin e përcaktuar mbetet në pikëpyetje. Prej dy muajsh, opozita është shprehur për bojkot të zgjedhjeve duke kërkuar qeveri teknike si kushti për të marrë pjesë në proces.
Ndërkohë që kreu i Partisë Socialiste, Edi Rama, shprehet i bindur se zgjedhjet do të mbahen më 18 qershor, duke iu referuar për këtë argument të tijin Kushtetutës. (M.D/ Shuplaka)
