Kryetari i Partisë Demokratike, Lulzim Basha, ka zhvilluar një takim urgjent me drejtues dhe deputetë
të qarkut Durrës lidhur me çështjen e lirimit të Lulzim Berishës. Në përfundim të mbledhjes të zhvilluar
në selinë e Partisë Demokratike, kryeopozitari Basha bëri me dije se PD do të kërkojë shkarkimin nga
detyra të kryetarit të Bashkisë Durrës, Vangjush Dako.
Në prononcimin për mediat menjëherë pas përfundimit të takimit, Lulzim Basha deklaroi se do t’i
kërkojë Prokurorit të Përgjithshëm nisjen e hetimit për konspiracion criminal. Ai theksoi se do të
kërkohet shkarkimi i Vangjush Dakos nga posti i kryebashkiakut pas lirimit të njeriut që vrau lirinë e
qytetarëve të Durrësit.
Më tej, ai u shpreh se e gjitha kjo është rezultat i politikave të gabuara të Ramës, që tanimë po
përdoret nga kriminelët që përdori për të qenë në pushtet.
“Kur krimi bashkohet me politikën, vritet liria dhe fatet e njerëzve, sikurse e kanë treguar qartë këto raste. Njerëzit e organizatave kriminale përbëjnë rolin kryesor, duke mbajtur në këmbë qeverisjen e Edi Ramës. Edi rama ka humbur çdo lloj kontrolli mbi institucionet. Ai i përdori kriminelët për të marrë pushtetin politik, tani kriminelët po e përdorin. Veprimet e Ramës do të tregojnë çfarë ai përfaqëson. Iu bëj thirrje gjithë qytetarëve pavarësisht bindjeve politike për të bërë presion Edi Ramës për të marrë përsipër përgjegjësitë. I bëj thirrje faktorit ndërkombëtar që të ushtrojë gjithë trysninë që mundet.”, u shpreh Basha.
Menjëherë pas deklaratës për mediat, Basha i është drejtuar Prokurorisë për t’u takuar me kryeprokurorin Adriatik Llalla. Pritet që ai të kërkojë shkarkimin e kryetarit të Bashkisë së Durrësit, Vangjush Dako.
13:00 – Pas takimit me kryeprokurorin Llalla, mësohet se PD ka nisur në Kryeministri kërkesën për shkarkimin e Vangjush Dakos. Kërkesa është firmosur nga këshilltarët bashkiakë dhe deputetët.
Discussion about this post