Kreu i Partisë Demokratike, Lulzim Basha i ftuar në emisionin ‘Studio e Hapur’është pyetur nëse ka një aleancë PD-PS për të falimentuar LSI. Basha tha se nuk ka aleancë kundër LSI por se partitë nuk duhet të sillen si shpk.
Ai po ashtu ka komentuar edhe deklaratat e Metës me Tomin dhe Xherrin duke iu referuar atij dhe Ramës.
Vasili: Por ju thoni se LSI do e falimentoni. Keni aleancë kundër LSI?
Basha: Jo, nuk them atë. Absolutisht nuk ka aleancë kundër LSI. Kam thënë që partitë të mos sillen si shpk. Kjo duhet të marrë fund. Këta kanë mbajtur njëri-tjetrin në pushtet dhe për hir të pushtetit kanë rrënuar ekonominë. 56% e shqiptarëve duan të ikin se ekonomia ka marrë fund. Këta flasin për reformën në drejtësi, por kjo reformë është e pandalshme. Zgjedhjet janë nëse do kemi një ekonomi të rrënuar dhe me taksa të larta. Pra kjo është zgjidhja për të dielën. Meta nuk ngriti kartonin kundër interesit të shqiptarëve, por e ngriti për pazaret. Tepsia që flasin sot janë të dy, Rilindja dhe Ilir Meta dhe të dy duhet të paguajnë faturën të dielën.
Vasili: Nga ana tjetër Ilir Meta nuk ka qëndruar në vend numëro. Ju ka quajtur Tomi dhe Xheri, madje dhe të pabesë?
Basha: Meta duket sikur po flet për veten e vet dhe Ramën. Se mos harrojmë këta dy kanë qenë në pushtet. Unë kam qenë në opozitë. Por unë nuk dua të merrem me batuta se po ti dëgjosh këta, thua kanë qenë në opozitë këto 4 vite. E kuptoni çfarë ju thonë shqiptarëve? Qeverisja ka qenë e tmerrshme, ka pasur drogë.. Ky tjetri thotë korrupsioni, emërimet. Gjithçka që thonë për qeverisjen e përbashkët është e vërtetë. Është ajo që kemi denoncuar ne për 4 vite. Por tani duke e ditur se shqiptarët nuk e hanë sapunin për djathë, po mundohen të na thonë sikur janë të rinj.
(M.D/Shuplaka)
Discussion about this post