Basha lë mënjanë diplomacinë, nis sulmin ndaj Ramës

Pas marrëveshjes së arritur gjashtë ditë më parë me kryeministrin Edi Rama, bazuar në paketën “McAllister+”, kryetari i Partisë Demokratike, Lulzim Basha, rikthehet sot me sulmet ndaj Ramës.

Ndryshe nga kreu i Qeverisë, i cili vazhdimisht ka sulmuar Partinë Demokratike dhe opozitën në tërësi gjatë takimeve të ndryshme elektorale përgjatë ditëve të fundit, kryedemokrati Basha ka qëndruar i distancuar, deri më sot.

Në shkrimin e sotëm, kryetari i PD-së ndalet tek mashtrimet e Ramës për vende pune, për shëndetësi falas, për fermerë që do të kishin mbështetje, por krimi zaptoi vendin dhe kanabisi mbuloi Shqipërinë.

Ai shkruan më tej se “Edi Rama kujtojn se njerëzit nuk kuptojnë dhe i tall çdo ditë ata”, por kjo do të “ndryshojë me Republikën e re që do të vijë”.

Shkrimi i Lulzim Bashës:

Edi Rama mendon se, meqë i gënjeu njerëzit njëherë, mund t’i gënjejë përsëri. Pasi nuk mbajti asnjë premtim, qoftë edhe një të vetëm, ai ka filluar të premtojë nga e para.

Premtoi 300 mijë vende pune, por nuk hapi asnjë. 300 mijë shqiptarë e braktisën Shqipërinë katër vitet e fundit për të gjetur punë në emigrim, por në vend të kërkojë falje, ai po gënjen prapë se do të hapë 220 mijë vende në mandatin e dytë. Në katër vite, të varfërit u varfëruan më shumë, ndërsa një grusht oligarkësh u bënë më të pasur nga favoret e qeverisë, por ai prapë gënjen kur thotë se do të punojë për të varfërit. Shëndetësia e premtuar falas është rrënuar dhe njerëzit paguajnë çdo gjë nga xhepi i tyre, por ai gënjen edhe një herë duke premtuar se do e bëjë falas në mandatin e dytë. Ai i braktisi fermerët e nuk u dha kurrë mbështetje, por ai tani premton se me të do të lulëzojë bujqësia. Krimi zaptoi shtetin e ekonominë dhe kanabisi mbuloi Shqipërinë, por ai thotë se ka bërë shtet dhe do bëjë edhe më shumë shtet.

Edi Rama kujton se njerëzit nuk kuptojnë, prandaj i gënjen, i përçmon dhe i tall çdo ditë ata. Shpërfillja ndaj qytetarëve dhe përqëndrimi i pushtetit e pasurisë në pak duar është vete thelbi i republikës së vjetër. Ndryshimi më i madh që do sjellë Republika e Re është kthimi i pushtetit tek njerëzit, të cilët do të kenë mundësi të jetojnë në mënyrë të ndershme, me punën dhe aftësitë e tyre.

#ZgjedhjeTeLira #RepublikaeRe​