Kreu i Partisë Demokratike ka hedhur poshtë zërat se mes tij dhe kryeministrit Edi Rama, ekziston një bashkëpunim i fshehtë që prej marrëveshjes së 18 Majit. Ai deklaroi sot nga foltorja e Parlamentit se zgjedhja e Gramoz Ruçit në krye të Kuvendit si edhe votat e dy demokratëve për të, e varrosën përfundimisht marrëveshjen e 18 majit.
“Aleanca e pandërprerë e Ramës me krimin dhe shitblerja e votave me paratë e drogës dhe të korrupsionit e vranë marrëveshjen. Nëse 25 shtatori e vrau marrëveshjen e 18 majit, 9 shtatori e varrosi përfundimisht. Jo vetëm zgjedhja e Gramoz Ruçit, por edhe akti mafioz i vjedhjes apo tjetërsimit të votave të dy demokratëve.”, është shprehur Basha.
Më tej ai i është përgjigjur fjalimit të kryeministrit Edi Rama të ditës së kaluar, kur i kujtoi thënien e Gramoz Pashkos: ‘Ato që na bashkojnë janë më shumë se sa ato që na ndajnë’.
“ E ardhmja e Shqipërisë dhe e fëmijëve tanë nuk kanë qenë kurrë më në pikëpyetje se sot.”
E ardhmja e tyre na ndan, nuk na bashkon. Ti ke zgjedhur të bësh aleancë me krimin e drogën. Në këtë betejë, unë dhe partia ime jemi me njerëzit, ne jemi kundër teje dhe kësaj aleance që po shkatërron Shqipërinë. Unë nuk jam këtu për familjen time, por sepse sa më të pasur bëhen politikanët aq më të varfër bëhen njerëzit e thjeshtë, sa mëshumë forcohen kriminelët, aq më poshtë bien njerëzit e thjeshtë. Edi Rama , ajo që na ndan është thelbësore. Kurrë më parë nuk ka qenë më e thellë, më e papajtueshme diferenca mes dy forcave politike në këtë sallë.”, ishte përgjigja e Bashës. (D.D/Shuplaka)
Discussion about this post