Pas takimit të sotëm me aleatët, kreu i opozitës Lulzim Basha nesër do të organizojë një tjetër takim. Këtë radhë me kryesinë e Partisë Demokratike.
“Shuplaka” mëson nga burime në PD, se mbledhja do të nisë nesër në orën 18:00 dhe do të diskutohet mbi detajet e protestës së 13 majit.
Protesta në fillim ishte parashikuar më 7 maj në Kavajë, mirëpo tërheqja e kryeministrit Edi Rama nga gara u bë shkak për ndryshim planesh. Kështu protesta u vendos të zhvendoset në kryeqytet më 13 maj.
Protestën e javës së ardhshme, e paralajmëroi një ditë më parë, vetë kreu i PD-së Lulzim Basha në çadrën e opozitës.
“Ultimatumet e Republikës së vjetër i refuzojmë, ose bashkojuni Republikës së Re, Republikës së Lirisë, zgjedhjeve të demokracisë së vërtetë, ose përballuni me marshimin më të madh të qytetarëve javën e ardhshme në bulevardin Dëshmorët e Kombit. Dhe pas kësaj në çdo shesh e në çdo rrugë të çdo qyteti e çdo fshati, ku vullneti i shqiptarëve për demokraci nuk sprapset kurrë. Zgjedhjet e lira dhe të ndershme para drogës dhe krimit, preferojmë dialog por vendosëm të marshojmë paqësisht drejt zgjidhjes, kjo është rruga e Republikës së Re, Shqipërisë në Europë. Zoti e bekoftë Kavajën, zoti e bekoftë Shqipërinë, zoti i bekoftë shqiptarët, fitore.”, deklaroi Basha. (D.D/Shuplaka)
