Kryetari i Partisë Demokratike Lulzim Basha, siç ishte paralajmëruar ka nisur takimin me aleatët, për të biseduar mbi protestën e parashikuar më 13 maj. Ai takoi edhe krerët e degëve të PD-së, takim i kryer në selinë e partisë së tij.
Protesta në fillim ishte parashikuar më 7 maj në Kavajë, mirëpo tërheqja e kryeministrit Edi Rama nga gara u bë shkak për ndryshim planesh. Kështu protesta u vendos të zhvendoset në kryeqytet më 13 maj.
Protestën e javës së ardhshme, e paralajmëroi një ditë më parë, vetë kreu i PD-së Lulzim Basha në çadrën e opozitës.
“Ultimatumet e Republikës së vjetër i refuzojmë, ose bashkojuni Republikës së Re, Republikës së Lirisë, zgjedhjeve të demokracisë së vërtetë, ose përballuni me marshimin më të madh të qytetarëve javën e ardhshme në bulevardin Dëshmorët e Kombit. Dhe pas kësaj në çdo shesh e në çdo rrugë të çdo qyteti e çdo fshati, ku vullneti i shqiptarëve për demokraci nuk sprapset kurrë. Zgjedhjet e lira dhe të ndershme para drogës dhe krimit, preferojmë dialog por vendosëm të marshojmë paqësisht drejt zgjidhjes, kjo është rruga e Republikës së Re, Shqipërisë në Europë. Zoti e bekoftë Kavajën, zoti e bekoftë Shqipërinë, zoti i bekoftë shqiptarët, fitore.”, deklaroi Basha.
Discussion about this post