Kreu i opozitës Lulzim Basha u shpreh dje se sot do të jetë dita e nisjes së Republikës së Re. Ai ka ftuar të gjithë shqiptarët që të shkojnë në protestë.
“Nesër tha Basha dje “do t’i bashkohen çadrës së opozitës, intelektualët, artistët, pensionistët, shkrimtarët, madje dhe vetë socialistët e zhgënjyer.”
“Nesër do të nisë Republika e Re. Në këtë shesh do vinë të rinjtë që kërkojnë një arsim ndryshe. Nesër bashkohen me ne qindra biznesmenë të vegjël, nesër do jenë me ne të gjithë pensionistët që nuk kanë para për të blerë ilaçet. Me ne nesër do të jenë sportistët, intelektualët dhe artistët. Ja pse dita e nesërme do të hyjë në histori, se është dita e bashkimit të padërgjuar më parë në vite dhe dekada. Me vendosmëri, mirësevini vëllezër dhe motra, qytetarë nga jugu në veri nesër në orën 12 në Sheshin e të ardhmes europiane”,-u shpreh Basha.
Por çfarë do të ndodhë sot në protestën e thirrur nga opozita dhe a do të ketë dhunë?
Basha zbuloi dje se sot do të jetë i shoqëruar nga bashkëshortja Aurela dhe fëmijët.
“Kthimi i monizmit që e shporrëm për të mos u kthyer më kurrë, nuk mundet e nuk do të kalojë nga votime farsë të diktuara nga droga dhe krimi, rruga do të kalojë nga autostrada e 13 majit që do të japë vulën e popullit shqiptar për zgjedghje të lira dhe të ndershme, të vetmet zgjedhje që do të bëhen në Shqipëri, ndaj bashkohuni me mua, me familjen time, me fëmijët e mi do të jemi këtu. Ejani me zemrat e mbushura me besim tek e nesërmja që po vjen, unë e kam parë të nesërmen e Shqipërisë, ju po e ndërtoni”,- u shpreh Basha.
Ndërkohë Ambasada Amerikane në Tiranë ka nxjerrë një njoftim për shtetasit amerikanë që banojnë në Shqipëri, lidhur me këtë protestë që organizon opozita.
Ambasada i këshillon qytetarët e vet që të mos marrin pjesë në protestë, pasi ekziston rreziku që nga një protestë paqësore të kthehet në një protestë të dhunshme.
“Ambasada u rikujton shtetasve amerikanë se edhe protestat paqësore mund të kthehen në konfliktuale, ndaj duhet të rishikoni planet për 13 majin”, -thuhet në deklaratë.
Kanë qenë disa ambasada të huaja në vendin tonë që sot u kanë bërë thirrje qytetarëve të tyre që të bëjnë kujdes nga protesta. Kanë qenë ambasada italiane, franceze dhe holandeze që kanë njoftuar sot për të bërë kujdes nga turma e protestuesve.
(M.D/Shuplaka)
