Kreu i Partisë Demokratike, Lulzim Basha ka takuar ditën e sotme banorët e Astirit në protestën e tyre që vazhdon prej rreth një viti në kundërshtim të projektit për vijimin e punës në ndërtimin e “Unazës së Re” ,duke e quajtur këtë investim si korruptiv.
Basha ka nënshkruar edhe një marrëveshje me banorët, sikurse bëri para disa ditësh me artistët që protestojnë për mos lejimin e shembjes së godinës së Teatrit Kombëtar.
Disa nga pikat e kësaj marrëveshje kanë të bëjnë me qëndrimet e Partisë Demokratike lidhur me këtë projekt, ku theksohet se nuk do të lejohet zgjatimi i saj pa u rishikuar projekti.
Marrëveshja përmban edhe zotimin e kryedemokratit për legalizimin e ndërtesave përgjatë segmentit që do të përshkojë projekti, duke mundësuar kështu kompensimin e çdo dëmi të shkaktuar, dhe kjo sipas marrëveshjes, do të ndodhë kur PD të vijë në pushtet.
Basha është zotuar po ashtu që do të mbështes çdo ditë dhe në çdo formë protestën dhe rezistencën e banorëve deri në zgjidhjen përfundimtare të çështjes në fjalë.
Gëzim Sadikaj, banor i Astirit dhe përfaqësues i revoltës kundër projektit dhe Lulzim Bashan ë emër të artisë Demokratike janë dy nënshkruesit e kësaj marreveshjeje.
Marrëveshja me banorët e Unazës së Re, PD angazhohet për rishikim të projektit dhe dëmshpërblim me çmimin e tregut
Banorët shprehin vendosmërinë për të vijuar pandërprerje betejën për mbrojtjen e banesave dhe pronës së tyre nga rreziku i prishjes pa dëmshpërblim. Duke e konsideruar kriminale prishjen e tyre për shkak të projektit korruptiv dhe pa u siguruar një shpërblim të drejtë, PD angazhohet për dy masa emergjente, rishikimin e projektit, dëmshpërblimin sipas çmimit të tregut.
“Brenda 2 muajve nga momenti kur Partia Demokratike e Shqipërisë dhe opozita e bashkuar do të jetë shumicë politike qeverisëse, do të rishikojë projektin e zgjerimit të Unazës së Re dhe devijimit të Lumit Lana, si dhe, në përputhje me interesin publik, do të ndërmarrë çdo masë që është e nevojshme për të siguruar zhvillimin e zonës sipas interesit të komunitetit dhe dëmshpërblimin, sipas çmimit të tregut, të çdo prone private që preket nga projekti i rishikuar” – thuhet në kontratën e firmosur nga kreu i opozitës Lulzim Basha dhe banorët e Unazës së re dhe Lumit të Lanës në pjesën ku ai do të devijohet.
Për ta konsideruar si pronë që dëmshpërblehet me çmimin e tregut, PD angazhohet që në momentin kur do të jetë shumicë qeverisëse, do t’i vlerësojë banesat e ndërtuara në zonën e Unazës së Re sipas Konventës Europiane për të Drejtat e Njeriut.
https://www.facebook.com/faxweb.al/videos/2939084349498138/
(F.GJ/FAXWEB.AL)
