“Basha nuk më telefonoi, por nuk mund ta akuzoj se ka nxitur ngjarjen” rrëfehet deputeti i dhunuar Bedri Hoxha

Deputeti që u dhunua një ditë më parë në Burrel, Bedri Hoxha, ka zbardhur të tjera detaje mbi ngjarjen e paprecedentë.

Në një prononcim për “News 24”, Hoxha përsëriti deklaratën e tij se kreu i partisë nuk e ka telefonuar për incidentin e ndodhur.

Mirëpo ai ka deklaruar se nuk mund të fajësojë Bashën për ngjarjen. “Nuk mund të akuzoj se Basha ka nxitur ngjarjen”, tha Hoxha.

“Unë jam anëtar i PD, anëtar i kryesisë së Matit, kisha mbështetje për kandidatët Lulzim Basha dhe Eduart Selami, shkova për të dëgjuar dhe kaq.

Absolutisht vetëm për të dëgjuar, se çfarë mund të kenë menduar të tjerët është detyrë e tyre dhe jo e imja.”, vazhdoi më tej deputeti.

Sakaq Hoxha ka treguar se e ka goditur një person me emrin Demir Cupi, i cili punon në bashki.

Kujtojmë se deputeti është goditur me grushte para pallatit të Kulturës në Mat, vetëm një ditë më parë, 20 minuta para nisjes së takimit të Bashës me demokratët në kuadër të zgjedhjeve për kryetarin.

Hoxha është deputet i PD-së deri në shtator, pasi Basha nuk e përfshiu në listën e kandidatëve për deputetë në zgjedhjet e 25 qershorit.

(D.D/Shuplaka)