Kryetari i Partisë Demokratike, Lulzim Basha, i është bashkuar protestës së banorëve të “Astirit”, protestë kjo që është në ditën e saj të 22-të.
Në fjalën e tij para medieve, Basha ka lëshuar një sërë akuzash ndaj qeverisë dhe policisë, pasi sipas tij kjo e fundit ka dhunuar dhe terrorizuar protestuesit në komisariat.
Më tej ai u shpreh se tashmë kjo protestë po merr rrjedhë tjetër, pasi nuk kërkohet më dëmshpërblim, por anulim i projektit, pasi është korruptiv. Kryedemokrati paralajmëroi se nesër do të bëhen publike prova të tjera për përfshirjen e Kryeministrit në një vepër korruptive.
“Ky është degjenerimi total i qeverisë së Edi Ramës që mban në burg protestuesit, të cilët mbahen aty si të burgosur politik nga qeveria, që nuk fut në burg kriminelët por ata që mbrojnë shtëpitë e tyre. Kemi një kryeministër i cili është përfshirë në një aferë korruptive për të cilën nesër PD do të nxjerrë të tjera prova se sa e madhe është vjedhja. Arrestimi dhe keqtrajtimi i të burgosurve nuk duhet anashkaluar nga media. Ne i kemi kërkuar avokatit të popullit të hetojnë rastin. Protestuesit nuk kanë pranuar të pranojnë para avokatit të popullit, shikoni se si e përdor frikën Edi Rama dhe disa banditë të tij në polici. E ka çuar në këtë shkallë vendin saqë të arrestuarit kanë frikë të pranojnë para policisë se janë rrahuar. Policët që kanë ushtruar dhunë mbi protestuesit do të përballen me ligjin. Tashmë që është zbuluar se kjo është një skemë vjedhjeje është e domosdoshme që të gjithë ti shkojnë deri në fund zbulimit të kësaj vjedhjeje sepse njerëzit që janë pjesë e kësaj skeme duhet ta dinë se nuk do ja hedhin paq, qofshin këta edhe sekserë apo biznesmenë. Edi Rama të tërhiqet nga kjo vjedhje dhe do të përgjigjet para ligjit”. – tha Basha.
(B.B/ Faxweb.al)
