Kryetari i Partisë Demokratike Lulzim Basha në një prononcim për mediat pas takimit me përfaqësues të partisë konservatore britanike, ka thënë se PD synion të implementojë një standard europian më të lartin sa i takon përzgjedhjes së kandidatëve për deputetë por edhe kryetarë bashkish.
“Tani po marrim përvojën më të mirë në kontinentin europian që është përvoja konservatore e kryeministres britanike, May”, tha ai.
Basha bëri të ditur se janë hedhur hapat për ndyshimin statutor. Ai u shpreh se kandidatët që do të përzgjidhen nga PD duhet të kenë për bazë interesin, publik, qytetar, dhe vlerat demokratike.
“PD po ashtu ka vendosur po në këtë statut garancitë që kandidatët të jenë njerëz me integritet dhe vlera të larta morale dhe përkushtim ndaj vlerave për të cilat qëndron PD, demokracisë e lirisë”, tha ai.
“I urdhëroj mirëseardhjen dy zotërinjve. PD prej prillit ka miratuar në statutin e saj një proces të përzgjedhjes së kandidatëve për deputet që e kalon vendimmarrjen tek anëtarësia e PD. Po ashtu ka vendosur po në këtë statut garancitë që kandidatët të jenë njerëz me integritet dhe vlera të larta morale dhe përkushtim ndaj vlerave për të cilat qëndron PD, demokracisë e lirisë. Sot demokracia shqiptare ndodhet në një krizë të thellë. Qytetarët shqiptarë shohin se përfaqësohen nga njerëz në Kuvend që s’kanë lidhje me partitë politike, siç është organizuat e Rilindjes, ku në mesin e saj gjendjen biznesmen me kredencialë të dyshimta. Kjo duhet të marrë fund. Që të marrë fund PD po kontribuon në dy drejtime. Në procesin e dekriminalizmit, dhe përmes propozimit tonë për vettingun e politikanëve, përmes vet reformës së politikës, reformës zgjedhore dhe të partive politike. Kemi hedhur hapin konkret të ndryshimit statutor dhe po marrim përvojën më të mirë në botë, për seleksionim të kandidaturave”, tha Basha.
(B.H/Faxweb)
