Paraditen e sotme, kryetari i Partisë Demokratike, Lulzim Basha, është takuar me të rinjtë e njësisë nr. 2 në kryeqytet. Në një deklaratë për mediat pas takimit me ta, kryedemokrati ka vijuar të theksojë rëndësinë e shqiptarëve të pranishëm në protestën e planifikuar të 18 shkurtit.
Në akuzat e tij drejtuar qeverisë me në krye Edi Ramën, ai u shprehs se të korruptuarit nuk mendojnë për të mirën e shqiptarëve, ata dinë vetëm të vjedhin. Sipas Bashës, protesta e 18 shkurtit do të sjellë ndryshimin që u duhet shqiptarëve.
“Kasta e korruptuar do tambajë Shqipërinë këtu ku është, siç është. Ta gjobisin, vjedhin, nëpërkëmbin. Secili prej tyre do ta marrë përgjigjen e shqiptarëve më 18 shkurt. Fillimi i një lëvizje që do i japë pushtet qytetarit. Gënjeshtrat për të justifikuar mosmbajtjen e premtimeve nuk i beson njeri. Edi Rama premtoi 300 mijë vende pune, por e ka futur ekonominë në kolaps. Më 18 shkurt nis një proces i pathyeshëm mbarë popullor për të dhënë zgjedhje të lira e të ndershme. Një process që do të ndryshojë fatin e këtij.”, është shprehur ndër të tjera Basha.
Fjala e plotë:
Ku ngrihen qytetarët, ku ngrihet rinia nuk ka qeveri të korruptuar e të inkriminuar t’ju bëjë ballë. E pamë në Rumani, tani është radha e shqiptarëve të ngrihen kundër papunësisë, kundër shëndetësisë së kolapsuar, kundër arsimit në ditën më të zezë, kundër diskriminimit të rinisë që i është lënë emigracioni si rruga e vetme.
Rinia është e persekutuara kryesore e këtyre katër viteve. Sepse këtu është ngritur një sistem antivlerash, ku krimi dhe krimineli bëjnë përpara, bëhen deputetë, bëhen kryetarë bashkish, bëjnë para e katandi, ndërsa rinia, intelektualët, të mençurit detyrohen të shkojnë në emigracion. Kjo duhet të marrë fund, këtë e kanë në dorë qytetarët e ka në dorë rinia.
Ndaj më 18 shkurt ngrihemi të gjithë bashkë për të marrë fatet në dorë, për të diktuar me pushtetin e qytetarëve zgjedhjet e lira dhe të ndershme dhe përmes tyre për të diktuar që pushteti t’iu kthehet një herë e mirë qytetarëve.
Rinia e Tiranës është gati. I bëj thirrje të rinjve dhe të rejave kudo t’i bashkohen përpjekjes tonë të madhe qytetare, e cila ka dhe do të ketë vetëm një përfundim. Fatin e qytetarëve në duart e qytetarëve. Të kthejmë pushtetin te qytetarët dhe të nisim ndryshimin. Të jetë edhe Shqipëria pjesë e erës së ndryshimit që ka përfshirë të gjithë shoqërinë e civilizuar në Europë, në Amerikë dhe në mbarë botën.
(XH.A/SHUPLAKA)
