Basha për darkën e krerëve të koalicionit: Buka e popullit do t’i ngecë në fyt Ramës dhe Metës

Kryetari i Partisë Demokratike, Lulzim Basha, ka reaguar sërish së fundmi lidhur me protestën e opozitës që ka hyrë në ditën e pestë të saj.

Ai ka reaguar lidhur me darkën e djeshme të bashkëkrerëve të koalicionit qeverisës, Edi Rama dhe Ilir Meta, duke u shprehur se “buka e shqiptarëve do u ngecë në fyt”.

Kryedemokrati shprehet i vendosur për protestën që do të vazhdojë, e cila do të përfundojë me dështimin e Ramës dhe fitoren e popullit.

“S’do të bëhem pjesë e asnjë pazari politik. Nuk ka Pazar për zgjedhje të lira dhe të ndershme. Jam ushtar i kauzës deri në fitoren e saj. Nuk ka kthim prapa, jemi këtu për të shembur nga themelet këtë sistem të korruptuar. Buka e popullit do t’i ngecë në fyt Ramës dhe Metës.

Rama do të dështojë me turp sepse populli do të fitojë. Nuk ka kthim në parlament pa u plotësuar kushtet tona.”, mësohet të ketë thënë Basha.

Protestës në ditën e saj të pestë i janë bashkuar edhe naftëtarët. (XH.A/SHUPLAKA)