Gjatë vizitës së tij në Shqipëri, zv.kryeministri dhe ministri i Jashtëm i Kosovës Behgjet Pacolli, ka takuar disa nga figurat kryesore të politikës shqiptare.
Së fundmi, Pacolli ka takuar liderin e opozitës Lulzim Bashën. Gjatë këtij takimi, Basha dhe Pacolli kanë diskutuar çështje të interesit të përbashkët.
Gjatë takimit, Basha përfitoi të uronte Pacollin për detyrën e rëndësishme dhe e siguroi se Partia Demokratike do të jetë në mbeshtetje dhe në bashkëpunim të plotë me qeverine e re të Kosovës dhe i uroi sukses në përballimin e sfidave të shumta në interes të Kosovës dhe popullit të saj.
Mes të tjerash ai i bëri një panoramë të zhvillimeve politike në Shqipëri, ku vuri theksin te nevoja jetike për stabilitetin dhe të ardhmen europiane të vendit, ku me rëndësi kyçe janë zgjedhjet e lira e të ndershme. Basha theksoi se për Partinë Demokratike, integrimi europian dhe interesi kombëtar do të jenë shtyllat kryesore të çdo qëndrimi të PD-së.
Basha theksoi se mbështet dhe nxit integrim sa më të thellë mes Shqipërisë dhe Kosovës, në këtë kuadër përshëndet vullnetin për bashkim doganor, por theksoi se kjo bëhet me një angazhim të thellë e të plotë dhe jo sipërfaqësor.
Kreu i opozitës tha se Partia Demokratike do të mbështesë me çdo kapacitet diplomacinë e Kosovës me sfidat e saj ndërkombëtare të antarësimit në organizmat ndërkombëtarë. (D.D/Shuplaka)
Discussion about this post