Basha: Voltana Ademi është zonjë grua

Kreu i të djathtëve Lulzim Basha ka reaguar në rrjetet sociale mbi përplasjen Rama-Ademi ditën e sotme.

Sipas Bashës Ademi është një kryebashkiake që po punon për Shkodrën dhe se Rama e ka lënë qytetin pa mbështetje si hakmarrje politike.

“Voltana Ademi është një zonjë grua që punon dhe përpiqet për Shkodrën edhe pse Edi Rama e ka lënë Shkodrën pa fonde dhe pa mbështetje si hakmarrje politike ndaj saj” shkruan Basha.

Basha ka shtuar po ashtu se Ademi e bën nervoz Ramën sepse i kujton se gjysmën e kryebashkiakëve të vet i ka me të shkuar kriminale dhe se ka deputetë të pangopur që vjedhin popullin.

“Edi Rama e sulmoi sot Voltanën, për të disatën herë, sepse Voltana e bën nervoz. E bën nervoz Edi Ramën sepse ajo i kujton që gjysmat e kryetarëve socialistë të bashkive i ka përdhunues, trafikantë dhe kriminelë gjithfarësojesh nga Elvis Rroshi tek Adriatik Zotkaj. Voltana e bën nervoz Edi Ramën sepse ajo i kujton atij se Shkodrës i vuri deputet një hajdut të pangopur si Ilir Beqja. Edi Ramën e bën nervoz Shkodra, e bën nervoz e gjithë Shqipëria sepse nuk i gënjen dot më me fasadat dhe premtimet mashtruese dhe as nuk i tremb dot më me të fortë” shkruan Basha.

Kryetarja e Bashkisë Shkodër, Voltana Ademi ka reaguar pas takimit të Edi Ramës me shkodranët ditën e sotme ku shpërndau leje legalizimi dhe lëshoi kritika drejt Ademit.

Voltana Ademi i është përgjigjur në rrjetet sociale Ramës duke  thënë se ai tallet me njerëzit e thjeshtë që takon.

“Po të isha në vendin tënd do më vinte turp të dilja para popullit! Dy fjalë Edi Ramës që vjen e tallet me njerëz të thjeshtë duke i thënë: “Shiko nga kamera dhe thuaj kshu”, “hajde fol po mos thuaj këtë po thuaj atë”, “hajde falendero babën”, “me cilën parti je”, “a më do fort”,”ku merr vesh ti..” etj etj”,  shkruan Ademi.

Duke komentuar batutën e Ramës për krevatin e Bashës, kryebashkiakja e Shkodrës thotë se Edi Rama nuk ka një shtrat po shumë shtretër pasi flet nga shtretërit e shokëve te shumtë kriminelë të rrezikshëm që i bëri deputetë e kryetarë bashkish.

“Edi Rama nuk ka një shtrat po shumë shtretër pasi flet nga shtretërit e shokëve te shumtë kriminelë të rrezikshëm që i bëri deputet e kryetar bashkish. Sot të gjithë po i shohim me zë e figurë se janë vrasës, tutorë e trafikantë droge.”, shkroi Ademi.

(M.D/ Shuplaka)