Kryetari i partisë Demokratike Lulzim Basha, po zhvillon takime me qytetarë të Malësisë së Madhe me të cilët ka ndarë shqetësimin e tij për situatën ekonomike dhe politike në të cilën ndodhet vendi, për emigrimin e të rinjve si edhe për problemet që hasin çdo ditë qytetarët në lidhje me çmimet dhe taksat.
Basha midis shumë qytetarëve të tjerë është takuar edhe me një tregtarë i cili i ka shprehur shqetësimin për largimin e të rinjve dhe problemet që po kalon me biznesin e tij.
Tregtari nga Kopliku Gazmend Fili: Kemi një krizë shpirtërore. Janë duke ikur edhe familjarët, jo vetëm të rinjtë.
Lulzim Basha: Hera e parë që vij këtu tek ti. Sa kohë ke që e ke hapur këtë dyqan?
Tregtari Gazmend Fili: Që në 2010. Të punësuar kam pasur para 3 viteve, por tani e largova, se s’kam me çfarë ti paguaj rrogat dhe sigurimet. Jemi në një situatë që para 3 viteve, gjimnazi ka pasur 700 nxënës, sot ka 350. Përveç krizës së nxënësve, është edhe kriza shpirtërore. Janë duke ikur edhe familjarët, jo vetëm të rinjtë. Jam 30 vjeç, me diplomë e nuk shoh asnjë perspektivë. Situatë është e vështirë, por me ndihmën e Zotit, shpresoj të bëhet më e mira.
Basha: Me ndihmën e Zotit, por edhe me punën e njerëzve të ndershëm. Por është e vështirë, sepse tani nga 1 apo 2 taksa, paguani 5-6 taksa e tarifa. Edhe niveli i taksave është shtuar. Kemi represion shtetëror mbi biznesin. E dyta, gjithçka që mund të shesim, e kanë uzurpuar vetëm 2 njerëz. Gjithçka shkon në duart e këtyre dy njerëzve. Me këto goditje, do ishte shkatërruar ekonomia gjermane, jo ekonomia jonë. Kjo situatë përcillet tek e gjithë ekonomia. Familjet zhyten në borxh e detyrohen të emigrojnë. Prandaj duhet çlirim, ndryshim i madh dhe ta përqafojmë të gjithë këtë ndryshim. Jo vetëm PD, por edhe biznesi i vogël, të gjithë. Ky sistem duhet shembur. Duhet shembur sistemi, pasi Rama është i rënë, ai i pari e di këtë.
Kreu demokrat është ndalur edhe në një furrë buke ku është takuar me një bukëpjekës nga ku ka deklaruar se “prioritet është kthimi i rritjes ekonomike, i cili hap edhe vende pune. Kjo do të jetë një nga sfidat tona kryesore”.
Basha: Sfida jonë kryesore, ndalimi i hemorragjisë së largimeve
Bukëpjekësi: Po ecën shumë keq. Shumë njerëz kanë ikur nga Malësia e Madhe. Gjithçka ndikon tek konsumi. Plus që taksat e reja na detyrojnë që çdo ditë të largojmë punëtorët që kemi pasur. Në Koplik janë 3 bukëpjekës dhe të gjithë janë në të njëjtën situatë.
Basha: Ne duhet të ndalim hemorragjinë e largimeve. Para një muaji e gjysmë ishim në Hot dhe atje ishte mbyllur shkolla krejt. Prindërit qanin. Dhe nuk bëhet fjalë për një vend të varfër. Vendi ynë i ka të gjitha mundësitë të mbajë popullsinë aktuale por edhe ta dyfishojë, prandaj prioritet është kthimi i rritjes ekonomike, i cili hap edhe vende pune. Kjo do të jetë një nga sfidat tona kryesore. Do keni mbështetjen tonë totale. Taksa e vetme që do paguani me qeverinë e Partisë Demokratike do të jetë 0,5 % e xhiros, taksë e përbashkët vendore dhe qendrore. Kështu që ju s’do ta keni mendjen tek ryshfeti që kërkon shteti, por do ta keni mendjen vetëm të punoni e të prosperoni.
(F.GJ/FAXWEB.AL)
