Pas takimeve të zhvilluara një ditë më parë me partitë mbështetëse të PD-së, të cilat nënshkruan memorandumin mbi reformën zgjedhore dhe takimit të grupit parlamentar demokrat, kryetari i Partisë Demokratike, Lulzim Basha, ka thirrur në selinë e demokratëve krerët e PD-së në rrethe.
Takimi me krerët e PD-së në rrethe vjen pas deklaratës të një dite më parë të Bashës për zgjedhjet e ardhshme, ku ai bëri me dije se kandidatët do të propozohen nga vetë qytetarët. Ai lajmëroi se po nis mbledhja e propozimeve për kandidatët për deputetë në zgjedhjet e ardhshme.
Po ditën e djeshme, kryetari i Partisë Demokratike mirëpriti partitë e tjera opozitare, me të cilat u nënshkrua memorandumi për garantimin e standardeve të zgjedhjeve në Shqipëri. Në mesin e partive që nënshkruan ishin: Partia Republikane, Partia Demokristiane, Aleanca Kuqezi, Partia Bashkimi i te Drejtave te Njeriut, Partia Agrare Ambjentaliste, etj.
Ky takim u pasua nga një mbledhje e grupit parlamentar të PD-së që u karakterizua nga debate të shumta mbi çështjen e bojkotit të punimeve të Kuvendit në rast se mazhoranca nuk merr në konsideratë propozimet e demokratëve për votimin dhe numërimin elektronik. (XH.A/SHUPLAKA)
Discussion about this post